ჩვენი ფეისბუქ გვერდის მიმდევრებს, ე.წ. ფოლოუვერებს კარგად გემახსოვრებათ 2022 წელს გაკეთებული ჩვენი ანონსი GAGA FRANI-ს ვინილის ფირფიტის გამოცემასთან დაკავშირებით (https://www.facebook.com/reel/1196050021233452 )
გაგას უამრავი თაყვანისმცემელი ჰყავს. უამრავი შეტყობინება მივიღეთ, ბევრმა დაგვირეკა და კითხულობდნენ როდის ექნებოდათ ამ ალბომის ხელში დაჭერის და მოსმენის ბედნიერება. ჩვენ ვაიმედებდით, რომ ”ძალიან მალე” თუმცა, ეს არც გაგაზე იყო დამოკიდებული და არც ჩვენზე. დიახ, მას შემდეგ ბევრმა წყალმა ჩაიარა. მოვიდა შემოდგომა, მოვიდა ზამთარი. თოვლიც მოვიდა, შემდეგ წავიდა. თებერვალიც დადგა, ხეშიც ჩადგა წყალი, აორთქლდა კიდეც და… 🙂 შემდეგ ”მარტი მოვიდა”, გაზაფხულდა და აი, გუშინ, 15 მარტს დადგა ის დღე, როდესაც საბოლოოდ შედგა ამ არაჩვეულებრივი ალბომის პრეზენტაცია.
პრეზენტაციამ დიდებულად ჩაირა. ბევრმა ადამიანმა მოიყარა თავი და ბევრს აინტერესებდა როგორი იყო ფირფიტა, რომელსაც ასე ელოდა. საღამოზე საკმაოდ თბილი გარემო იყო, მეგობრული, საინტერესო, შინაურული, გემრიელი და ცრემლიანიც თქვენ წარმოიდგინეთ. გაგა თავიდან თითქოს ღელავდა. თითქოს დაბნეული იყო. ბევრჯერ ვყოფილვარ მის ცალკეულ გამოსვლაზე თუ გამართულ კონცერტზე, თუმცა მსგავსი მღელვარება არასდროს შემიმჩნევია. შემდეგ მივხვდი რაშიც იყო საქმე და თვითონაც აღიარა, რომ ეს ღელვა გამოწვეული იყო მხოლოდ ერთი რამის გამო. მისი საოცნებო ფირფიტის გამოცემით. პირველად 8 წლის ასაკში მოუსმენია ვინილის ფირფიტისთვის და უფიქრია: ნუთუ ჩემი ხმაც შეიძლება ფირფიტაზე გაჟღერდეს-ო? და დიახ, დღეს სწორედ ის დღე იყო, როდესაც მისი არამხოლოდ ხმა, არამედ წლების ნაშრომი გაჟღერდებოდა ვინილზე და უამრავ ადამიანს ამით სიამოვნებასაც მიანიჭებდა. დიახ, სწორედ ეს იყო მისი აფორიაქების მიზეზი. თუმცა, ღელვამ ძალიან მალე გაიარა და საბოლოოდ სწორედ ის გაგა დაგვიბრუნდა, რომელსაც სცენიდან ვიცნობთ ლაღი, ღიმილიანი და რომელიც თავისი დადებითი ენერგიით და მელოდიებით გვავსებს მსმენელს.
საღამოზე შესრულდა ალბომში შესული სხვადასხვა დროს დაწერილი ყველა სიმღერის აკუსტიკური ვერსია ნიკოლოზ ლეჟავასთან ერთად (სამი მათგანი თქვენც შეგიძლიათ მოისმინოთ ქვემოთ მოცემულ იუთუბ ლინკზე). თუმცა, ყველა ეს შესრულება არაფრით ჩამოუვარდებოდა ალბომში შესრულებულ სტუდიურ ვარიანტს. მსმენელიც გულისყურით უსმენდა და ოვაციაც შესაბამისი იყო. მოკლედ რომ ვთქვათ, ფირფიტის პრეზენტაციამ დიდებულად ჩაიარა. კმაყოფილი იყო თავად გაგა და რა თმა უნდა კმაყოფილი იყო იქ შეკრებული საზოგადოება. დასასრულს რა თქმა უნდა დარიგდა ავტოგრაფები და იქ შეკრებილი ადამიანებიც კმაყოფილები გაუყვნენ თავიანთ გზას.
რაც შეეხება ალბომს, ის ერთ დისკიანია.
მასში შესულია 7 სიმღერა, ხანგრძლივობა კი შეადგენს 21:45 წუთს.
კატალოგის ნომერი: CAT 574756
სიმღერები ჩაწერილია საქართველოში, სტუდიაში ”33ა” 2022 წელს. ხმის რეჟისორი ლევან კიკვიძე (კიკვა)
მასტერინგი გაკეთებულია გერმანიაში
დიზაინი ეკუთვნის ნიკა ანჯაფარიძეს (ანჯიკა)
ჩვენ რა თქმა უნდა წარმატებებს ვუსურვებთ გაგას და ველოდებით მის შემდეგ ალბომს უპირობოდ მხოლოდ ფირფიტაზე 😉 და ასევე იმედს ვიტოვებთ, რომ ჩვენს ონლაინ მაღაზიაშიც მალე ჩაეშვება გაყიდვაში ეს არაჩვეულებრივი ალბომი. სულსწრაფებს კი შეგძლიათ ალბომი ბიბლუსის მაღაზიათა ქსელში შეიძინოთ 🙂
ძალიან კარგი ფირფიტაა როგორც დიზაინით, ასევე ალბომში შესული სიმღერებით. წარმატებები