მეგობრები მეუბნებიან: “მსურს ვიყიდო საკრავი, მაგრამ დაბნეული ვარ მოდელებს შორის განსხვავებაზე, ამიტომ არ ვიცი რა ვიყიდო”. ხშირად ისინი შიშობენ, რომ შეიძენენ არასწორ საკრავს და შემდეგ ინანებენ ამ გადაწყვეტილებას.
ვინილომანებს უყვართ ბევრი კამათი Hi-Fi სამყაროში. ერთმანეთს ადარებენ ყველაფერს. ციფრულ ხმას და ანალოგს, შემსრულებლებს და ჯგუფებს, გამაძლიერებლებს, სფიქერებს, საკრავებს, მოკლედ ყველაფერს რაც კი შეიძლება ვინილომანიის გარშემო შეადარო და იკამათო. ბევრჯერ შემხვედრია კამათი საკრავებზე. ზოგს დავსწრებივარ კიდეც პირადად, ზოგისთვის უბრალოდ ონლაინ მიდევნებია თვალყური. მაშინ, როდესაც საქმე ეხება Belt Drive (ღვედით მართულ) და Direct Drive (პირდაპირ ამძრავიან) საკრავებს, ეს კამათი იწვევს დაბნეულობას მათთვის, ვინც ახალია ამ საქმეში და სურს შეიძინოს საკრავი. მათ ხშირად აქვთ ერთი და იგივე კითხვები პირდაპირ და ღვედით მართულ საკრავებთან დაკავშირებით, ამიტომ გადავწყვიტე შემეკრიბა ჩემი ყველაზე გავრცელებული პასუხები ამ სტატიაში, რათა დავეხმარო ახალბედებს გადაწყვეტილების მიღებაში. ეს ბლოგიც ხომ სწორედ ამიტომ შევქმენით.
რა განსხვავებაა ღვედით მართულ და პირდაპირ ამძრავიან საკრავს შორის?
ამ მხრივ არსებობს ორი სახის საკრავი: ღვედით მართული და პირდაპირ ამძრავიანი. ღვედით მართული საკრავი იყენებს ღვედს თეფშის დასატრიალებლად. ხოლო, პირდაპირ ამძრავიან საკრავზე თეფში უშუალოდ არის დაკავშირებული ძრავზე, რომელიც პირდაპირ, ღვედის გარეშე ატრიალებს მას და მასზე დადებულ ვინილის ფირფიტას. განსხვავებაც სწორედ ეს არის.
რომელია უკეთესი, ღვედით მართული თუ პირდაპირ ამძრავიანი საკრავი?
იმის გამო, რომ პირდაპირ ამძრავიანი საკრავზე თეფში მიმაგრებულია უშუალოდ ძრავზე, დაკვრის დროს მას შეუძლია გამოიწვიოს მეტი ხმაური და ვიბრაცია. ამიტომ, ბევრი აუდიოფილისვთის, ღვედით მართული საკრავი უკეთესია, რადგან განცალკევებული ძრავა გამორიცხავს ძრავით გამოწვეულ ხმაურს და შესაბამისად ირჩევს Belt Drive საკრავს.
მე მაქვს ორი პირდაპირ ამძრავიანი საკრავი. Audio-Technica AT-LP120-USB და 1981 წელს გამოშვებული Akai. თუ მკითხავთ რომელია შენი ფავორიტი, გეტყვით რომ გააჩნია სიტუაციას. ორივე ძალიან მიყვარს და ორივეს აქტიურად ვიყენებ, თუმცა მათში განსხვავება რათქმა უნდა არის. გულწრფელად გეტყვით, რომ აუდიო ტექნიკას აქვს მცირედი ძრავის ხმა, თუმცა უცხო ყური ამას ვერ ამჩნევს. ეს ხმა შეიძლება შეამჩნიო მხოლოდ კომპოზიციებს შორის პაუზებში და ისიც მხოლოდ მაშინ, როდესაც მაღალ ხმაზე ვისმენ მუსიკას. რაც შეეხება აკაის, მიუხედავად მისი ასაკისა და სიძველისა, მსგავსი ხმა მას არ აქვს და არც არასდროს შემიმჩნევია.
როგორც გითხარით, თუ თქვენთვის პირველ საკრავს ეძებთ ამ მხრივ თავს ნუ შეიზღუდავთ, რადგან ისევ ჩემი გამოცდილებიდან გამომდინარე, ძრავის ხმა თუ ექნება, ის იმდენად მცირე იქნება, რომ ვერ შეამჩნევთ. თუმცა, დროთა განმავლობაში როცა უკვე მოვა ტექნიკის გადახალისების დრო (ამას დრო გიჩვენებთ 😉 ) მას აუცილებლად ჩაანაცვლებთ უკეთესი საკრავით და უკვე გექნებათ იმდენი გამოცდილება და ცოდნა, რომ აღარ დაგჭირდებათ ჩვენი რჩევები. მოკლედ, არჩევანი თქვენია, თუმცა საკრავის პირველად ყიდვისას მე უფრო მეტ ყურადღებას გავამახვილებდი სხვა მახასიათებლებზე, როგორიცაა მაგალითად სტილუსის (ნემსის) ხარისხი და დანარჩენი კომპონენტები.
აქვთ თუ არა ღვედები პირდაპირ ამძრავიან საკრავებს?
არა, პირდაპირ ამძრავიან საკრავებს არ აქვთ ღვედი, რადგან როგორც წეღან ავღნიშნე, ძრავი უშუალოდ მიმაგრებულია პირდაპირ ფირფიტის დასადებ თეფშზე. ღვედები დროთა განმავლობაში ცვდება, იჭიმება და შეიძლება გამოიწვიოს თეფშის არასწორი სიჩქარით ბრუნვა, რაც გამოიწვევს დამახინჯებულ, შენელებულ და უხარისხო ხმას. (ამ თემაზე ჩვენს ერთ-ერთ წინა ბლოგში ვისაუბრეთ და შეგიძლიათ თვალი გადაავლოთ თუ ჯერ კიდევ არ წაგიკითხავთ) ამ მიზეზით, ბევრი ადამიანი უპირატესობას ანიჭებს პირდაპირ ამძრავიან საკრავებს, სადაც მათ არასდროს უწევთ ღვედის გამოცვლა.
რა განსხვავებაა პირდაპირ ამძრავიან და ღვედით მართულ თეფშს შორის?
როგორც ზემოთ ავღნიშნე, განსხვავება პირდაპირ ამძრავიან და ღვედით მართულ საკრავს შორის არის ის, თუ როგორ ან რა მექანიზმით ბრუნავს ფირფიტა. Belt Drive საკრავის ძრავი იყენებს რეზინის ღვედს თეფშის დასატრიალებლად, ხოლო პირდაპირ ამძრავიანის ძრავა უშუალოდ პირდაპირ ატრიალებს ფირფიტას.
რა განსხვავებაა პირდაპირ ამძრავიანსა და სრულად ავტომატურ საკრავს შორის?
არავითარი განსხვავება არ არის პირდაპირ ამძრავიან და სრულად ავტომატურ საკრავს შორის. მეტსაც გეტყვით, საერთოდ სხვადასხვა რამ არის ეს ორი. უბარალოდ აგიხსნით, სრულად ავტომატური საკრავის მუშაობის პრინციპს. საკრავის Start ღილაკზე დაჭერით, Ton-arm (საკრავის მკლავი რაზეც თავის მხრივ მიმაგრებულია კარტრიჯი) იწევა და ავტომატურად იდება მბრუნავ ფირფიტაზე. შემდეგ, როდესაც გავა ფირფიტის ბოლოს და დასრულდება, მკლავი ისევ ავტომატურად დაუბრუნდება თავის საწყის პოზიციას თქვენი დახმარების გარეშე.
როგორ მუშაობს ნახევრად ავტომატური საკრავი?
რადგან გავეცანით სრულად ავტომატური საკრავის მუშაობის პრინციპს, მოდით ვნახოთ როგორ მუშაობს ნახევრად ავტომატური საკრავი. ამ შემთხვევაში Start ღილაკზე დაჭერით საკრავი ავტომატურად დაიწყებს დაკვრას ან ავტომატურად გაჩერდება, მაგრამ არა ორივე როგორც ეს სრულად ავტომატურ საკრავებშია. ნახევრად ავტომატურ საკრავებში Start ღილაკზე დაჭერით მკლავი ავტომატურად აიწევა და საკრავი დაიწყებს დაკვრას, მაგრამ როდესაც ალბომი დასრულდება, მკლავი ადგილზე დარჩება და თქვენ ხელით უნდა დააბრუნით ის თავის ადგილზე. ან, დააჭერთ Start ღილაკს, ასწევთ მკლავს, დადებთ უკვე მბრუნავ ფირფიტაზე და როცა გავა ფირფიტის ბოლოს, მკლავი ავტომატურად დაუბრუნდება თავის საწყის პოზიციას.
რატომ არის Direct Drive უკეთესი?
პირდაპირ ამძრავიანი საკრავი საუკეთესოდ ითვლება მათთვის ვინც დაინტერესებულია DJ-ინგით, უყვარს ”სქრეჩვა”, უპირატესობას ანიჭებს უფრო სწრაფ გაშვებას და რეგულირებას, როგორიცაა ტემპის ადვილად კონტროლის უნარი. თუმცა როგორც ზემოთ აღვნიშნეთ, ტრადიციული აუდიოფილები უპირატესობას ანიჭებენ ღვედით მართულ საკრავებს. მათ აქვთ უფრო მშვიდი და ჩუმი დაკვრა ზედმეტი ხმაურის გარეშე, რადგან ძრავა არ არის მიმაგრებული თეფშზე და იგი დაკავშირებულია ღვედით.
შეგიძლიათ Scratch ან DJ მანიპულაციები Direct Drive საკრავით?
დიახ, რა თქმა უნდა თქვენ შეგიძლიათ ნებისმიერ ასეთ საკრავზე დაკავდეთ სქრეჩინგით და მიქსვით. Technics SL-1200/SL-1210 Mk7 სერია, Audio-Technica AT-LP140XP, Pioneer DJ PLX-1000, Denon DJ VL12, Reloop RP-8000 Mk2 ეს იმ საკრავების მცირე ჩამონათვალია, რომელსაც იყენებენ დიჯეები დღევანდელ დღეს და რომელიც თქვენც შეგიძლიათ შეიძინოთ. ეს უბრალოდ ბიუჯეტის და სურვილის ამბავია.
კარგია თუ არა Direct Drive საკრავები?
მთლიანობაში, პირდაპირ ამძრავიანი საკრავები გვთავაზობენ ძალიან კარგ დაკვრის ხარისხს. პირდაპირ ამძრავიან საკრავებს აქვთ ხანგრძლივი მოქმედების ვადა და მათი მოვლა-შენარჩუნება მარტივია, მით უმეტეს, რომ ისინი არ საჭიროებენ გაცვეთილი ღვედის გამოცვლას. თუმცა, ღვედის გამოცვლაც არ საჭიროებს დიდ ფილოსოფიას. საჭიროების შემთხვევაში, სულ რაღაც ხუთ წუთში, ზედმეტი ძალისხმევით გამოცვლით მას. იხილეთ ქვემოთ მოცემული ვიდეო და ამაში თავად დარწმუნდებით.
ბოლო-ბოლო რომელი ვიყიდო, პირდაპირ ამძრავიანი თუ ღვედით მართული?
მოდით ასე შევთანხმდეთ, თუ თქვენ ხართ დამწყები ვინილომანი და ყიდულობთ საკრავს, რომელიც არ საჭიროებს ზედმეტ მოვლას და გაგიადვილებთ მათთან ურთიერთობს, არ საჭიროებს ღვედების შეცვლას და გაძლევთ სქრეჩინგის და დიჯეინგის საშუალებას, პირდაპირ ამძრავიანი საკრავი შესანიშნავი ვარიანტია თქვენთვის. ხოლო, თუ გსურთ საუკეთესო აუდიოფილური ხმა მოისმინოთ თქვენი აუდიო სისტემიდან, მაშინ მე გირჩევთ შეიძინოთ ღვედით მართული საკრავი. თუმცა საუკეთესო ხმის მიღება მხოლოდ საკრავით არ ხდება. კიდევ ბევრი კომპონენტია, რომელიც აუცილებლად უნდა გაითვალისწინოთ.
ვიმედოვნებთ, რომ ეს სტატია დაგეხმარებათ სწორი გადაწყვეტილების მიღებაში. დაგეხმარებათ თქვენთვის სასურველი და მისაღები საკრავის შეძენაში. კარგი სტერეო სისტემის აწყობის სიამოვნების ნაწილი დროთა განმავლობაში კომპონენტების განახლებაა. დღეს შეძენილი საკრავი ორ წელიწადში შეიძლება არ იყოს თქვენთვის მისაღები, რადგან დროთა განმავლობაში განაახლებთ თქვენი აუდიო სისტემის სხვადასხვა კომპონენტს, როგორიცაა მაგალითად გამაძლიერებელი ან სფიქერები და ეს ნორმალურია. თქვენ ყოველთვის შეგიძლიათ ნებისმიერ დროს განაახლოთ ისინი და იპოვნოთ თქვენთვის სასურველი და მისაღები ხმა. ამას წლები ჭირდება და საკმარისად სქელი ჯიბეც. აკი გითხარით, ვინილომანობა ძალიან ბევრ დროს და თანხას მოითხოვს. თუმცა, ნაბიჯ-ნაბიჯ და აუჩქარებლადაც შეგიძლიათ საუკეთესო ხმის მიღება.
წარმატებებს გსურვებთ თქვენთვის მისაღებ Hi-Fi სისტემის აწყობაში
