15 წლიანი პაუზის შემდეგ, ლეგენდარული მულტიინსტრუმენტალისტი მარკუს მილერი ბათუმს კვლავ ეწვია ”შავი ზღვის ჯაზ-ფესტივალი”-ს ეგიდით და ევროპული ტურნეს ფარგებში. საათნახევრიანი კონცერტი წლევანდელი ფესტივალის ერთ-ერთი საუკეთესო წარმოდგენა იყო. უამრავი ხალხი, ზღვა ემოცია და ბევრი ჯაზი. ამ ყველაფრის ორგანიზატორი კი კვლავ კომპანია ”ისთერნ პრომოუშენსი” გახლდათ.
ფესტივალის ძირითადი სივრცე გახლდათ Stage 17, სადაც მსმენელს დახვდა არაჩვეულებრივი გარემო, განათება, გახმოვანება და რაც მთავარია უამინდობით გამოწვეული დისკომფორტი ნამდვილად არ იგრძნობოდა. თუმცა, ადგილზე მისულ მსმემნელს დისკომფორტი არც უგრძვნია და არც ეცალა, რადგან სცენაზე სამი დღის განმავლობაში პირდაპირი მნიშვნელობით, ცეცხლი ენთო.
ბიძია მარკუსი ტრადიციულად თავისი შლაპა ქუდით მოგვევლინა სცენაზე. გაგვაცნო მისი ბენდის ახალი წევრები და პირდაპირ საქმეზე გადავიდა.
საღამო კომპოზიცია “Detroit”-მა გახსნა, რომელიც მილერის 2012 წლის ალბომში Renaissance არის შესული. შემდეგ იყო ”Untamed” 2018 წლის ალბომიდან ”Laid Black”. შემდეგ ”February” რომელსაც მოჰყვა სტივ უანდერის ”Higher Ground” რომელიც მილერის სტილში იყო არანჟირებული და რომელიც საერთოდ თავიდან აღმოვაჩინე როგორც მსმენელმა. კიდევ ერთი ქავერი დაუკრა მილერმა ”Mr. Pastorius”, რომელიც ლეგენდარულ ჯაკო პასტორიუსს ეძღვნებოდა. ”Run For Cover”-იც არ დაივიწყა, რომლის შემდეგ მილერმა გადადო თავის ბას გიტარა და კლარნეტი აიღო, რათა შეესრულებინა არაჩვეულებრივი ”Goray”. საღამოს ოფიციალური ნაწილი კი რა თქმა უნდა დასრულდა კომპოზიციით ”Tutu”, თუმცა ბისზე გამოსულმა მილერმა ყველასთვის მოულოდნელად დაუკრა კომპოზიცია ”Blast” რომელმაც მართლაც რომ ააფეთქა იქაურობა და მიუხედავად ამ აფეთქებისა, თითქოს შეკრა მთელი ის ემოცია, რომელიც მსმენელს საათნახევრის განმავლობაში არ ტოვებდა.
თითქმის საათნახევრიანი სიგიჟე ამით დასრულდა. ემოციებით დატვირთულნი დავბრუნდით და ვფიქრობდით, ვაანალიზებდით თუ სად ვიყავით, რა მოვისმინეთ და დავრწმუნდით, რომ იქ მყოფი ადამიანები ლეგენდას უსმენდა და უყურებდა. ლეგენდას, რომელიც თავისი ქუდით, გიტარით და თავმდაბლობით დანახვისთანავე გხიბლავს და გინდა არ დაასრულოს დაკვრა.
და მაინც, ვინ არის მარკუს მილერი? უილიამ ჰენრი მარკუს მილერ ჯუნიორი 1959 წლის 14 ივნისს ნიუ იორკში დაიბადა. მამამისი, უილიამ მილერი მუსიკოსი იყო. ის ერთ-ერთი ეკლესიაში ორღანზე უკრავდა და ასევე ხელმძღვანელობდა ამავე ეკლესიის გუნდს. თავდაპირველად მარკუს მილერმა კლარნეტი შეისწავლა. შემდეგ კლავიში, შემდეგ საქსოფონი და ბოლოს ბას-გიტარაც. თავდაპირველად დაკვრა დაიწყო ფლეიტისტ ბობი ჰემფრისთან, რომელიც თავის მხრივ პირველი ინსტრუმენტალისტი ქალბატონი გახლდათ, ვისაც ცნობილმა ლეიბლმა Blue Note დაუდო ხელშეკრულება. მილერი ბობისთვის მუსიკას წერდა და ამავდროულა ბასზე უკრავდა. 1979-81 წლებში იყო ბენდ Saturday Night Live– ის წევრი. ასე ჩამოყალიბდა მილერი სესიურ მუსიკოსად, რომელმაც 15 წლის განმავლობაში დაუკრა უამრავ ცნობილ ბენდთან, შემსულებელთან თუ ავტორთან. მას დაკრული აქვს 500-ზე მეტი კომპოზიცია სხვადასხვა ალბომში ისეთ მუსიკოსებთან, როგორებიცაა Michael Jackson, Beyoncé, Herbie Hancock, Mariah Carey, Eric Clapton, Wayne Shorter, McCoy Tyner, Frank Sinatra, George Benson, Aretha Franklin, Elton John, Bill Withers, Kazumi Watanabe, LL Cool J და სხვა.
80-იანი წლებიდან კი მილერი იწყებს თავის სოლო კარიერას. 1983 წელს გამოდის მარკუს მილერის სადებიუტო ალბომი Suddenly, რომელშიც ყველა კომპოზიციას თავად მღერის, არის ყველა სიმღერის ავტორი და პროდიუსერი. მას შემდეგ მილერმა კიდევ დაახლოვებით 10 ალბომი გამოუშვა, სადაც შეგიძლიათ მოისმინოთ მისი ვოკალი, თუმცა უპირატესობას მაინც ინსტუმენტულ მუსიკას ანიჭებდა.
1988-90 წლებში ორი სეზონის განმავლობაში მილერი იყო ცნობილი ღამის შოუ ”Sunday Night”-ის ბენდის, Sunday Night Band-ის ხელმძღვანელი და წევრი, სადაც უამრავ კარგ მუსიკოსთან ითანამშრომლა და ნამდვილად ღირებული მუსიკალური ისტორიაც დაწერა.
როგორც კომპოზიტორი, მარკუს მილერი არის თანაავტორი ლეგენდარული მაილს დევისის ალბომისა Tutu, სადაც მხოლოდ ავტორობით არ შემოიფარგლება. ეკუთვნის ალბომში შესული 6 კომპოზიცია და მათი არაჟნირება და რა თქმა უნდა უკრავს ბას გიტარას.
1997 წლიდან, მილერი ხდება წევრი პროექტისა supergroup, რომელიც დაკომპლექტებული იყო ცნობილი და უკვე შემდგარი მუსიკოსებისგან. Eric Clapton- guitars, vocals; Joe Sample- piano; David Sanborn- alto sax და Steve Gadd- drums
2008 წელს მილერმა კიდევ ერთი supergroup ჩამოაყალიბა სახელწოდებით SMV სტენლი კლარკის და ვიქტორ ვუტენის შემადგენლობით. ჯგუფის სახელწოდებაც წევრების სახელების ინიციალებია. მსოფლიო ტურნეში მათ 18 თვე გაატარეს. თუმცა ტურნემდე სტუდიური ალბომი ჩაწერეს, სადაც უამრავმა ცნობილმა მუსიკოსმა მოიყარა თავი. ჯორჯ დიუკი, ჩიკ კორია, რუსლან სიროტა, პოგი ბელი და სხვა. Billboard–ის ჩარტში ალბომს მესამე ადგილი ეკავა.
მილერი უძღვება რადიოშოუს სახელწოდებით ”Miller Time მარკუს მილერთან ერთად” Sirius XM Holdings-ის სატელიტური რადიო სისტემის Real Jazz არხზე. ასევე გვევლინება უამრავი სრულმეტრაჟიანი ფილმის თუ მუტიპლიკაციური ფილმის მუსიკის ავტორად.
მარკუს მილერს მიღებული აქვს უამრავი ჯილდო. 1992 წელს საუკეთესო R&B სიმღერისთვის Luther Vandross’ “Power of Love”, ხოლო 2001 წელს Best Contemporary Jazz Album მისი კიდევ ერთი უმაგრესი ალომისთვის M², რომელიც რიგით მეშვიდე სტუდიური ალბომი გახლავთ. 2013 წელს გახდა Edison Award-ის მფლობელი, რომალსაც გერმანულ გრემისაც ეძახიან. ასევე, 2015 წელს ალბომი Afrodeezia გახდა ნომინაცია The Best Contemporary Instrumental Album-ის მფლობელი. 2021 წლის დეკემბერში მილერმა კიდევ ერთი ჯილდო მიიღო. ჟურნალმა Bass Player, ცხოვრებისეული მიღწევის ნომინაციაში გამარჯვებულად გამოავლინა. 2012 წელს მილერი დაინიშნა იუნესკოს ”არტისტი მშვიდობისთვის”, რომელიც მხარს უჭერს და ხელს უწყობს იუნესკოს მონების მარშრუტის პროექტს.
მილერს გამოცემული აქვს 10-ზე მეტი სტუდიური და 4 ლაივ ალბომი. ასევე 7 ალბომი მაილს დევისთან ერთად. დეივიდ სენბორნი, ლუთერ ვანდროსი, გროვერ უოშინგტონ ჯუნიორი, დიზი გილესპი, არეტა ფრანკლინი, ვეინი შორთერი, დეივ გრუსინ და ა.შ. ეს იმ მუსიკოსების მცირე ჩამონათვალია, რომელთანაც ხანგრძლივი მუსიკალური ურთიერთობა და ალბომები აკავშირებს მარკუს მილერს.
ასე, რომ თუ თქვენ იმყოფებოდით ”ბათუმის შავი ზღვის ჯაზ-ფესტივალზე” და იმყოფებოდით მარკუს მილერის კონცერტზე, იცოდეთ, რომ თქვენ ცოცხალ ლეგენდას უსმენდით და უყურებდით. იმედი ვიქონიოთ, რომ მარკუს მილერის სტუმრობა საქართველოში არ იყო უკანასკნელი და მომავალში კვლავ გვესტუმრება განახლებული ენერგიით, ახალი კომპოზიციებით და ძველი ჰიტებით. ჯაზ ფესტივალს კი შემოდგომამდე დავემშვიდობოთ.
