თბილისის რიგით 26-ე ჯაზ-ფესტივალი 11 მაისს დასრულდა. როგორც ყოველთვის, ფესტივალი დიდებულად წარიმართა. სამ დღიან ჯაზ-თავგადასავალში საკმაოდ ბევრმა კარგმა მუსიკოსმა მოიყარა თავი.
Luka Topuria & Band
Bill Evans, Niels Lan Doky, Felix Pastorius & Harvey Mason
Martin Kratochvil & Jazz Q
ANTONIO FARAO’ TRIO
Motel Kaiju
მაგრამ, ფესტივალის ჰაილაითერი მაინც STANLEY CLARKE *N* 4Ever გახლდათ, რომლებმაც დაასრულეს ეს სამ დღიანი სიგიჟე. სცენაზე ნამდვილი ჯაზური ცეცხლი დაინთო, რომელიც გარშემომყოფებს ენერგიით, ემოციით და სიხარულით აღავსებდა.
და მაინც, ვინ არიან სტენლი კლარკის გვერდით მდგარი ახალგაზრდა მუსიკოსები, რომლებმაც აღაფრთოვანა ქართველი მსმენელი. მოდით გავიცნოთ ისინი.
დრამერი Jeremiah Collier წარმოშობით ჩიკაგოდან გახლავთ. 23 წლის კოლიერი სავსეა ენერგიით, რომელსაც ჟანრების აღქმის ფართო გაგება აქვს. ის აერთიანებს ტექნიკას და შესრულებას ფიზიკურ ენერგიასთან და მისი ყურება და მოსმენა ერთი დიდი სიამოვნებაა. იერემია რამდენიმე წელია კლარკთან ერთად გამოდის დიდ სცენაზე. მასთან ერთად უკრავდა კონცერტზე 2022 წლის გაზაფხულზე, სადაც კლარკმა ”ჯაზის ოსტატის ჯილდო” მოიპოვა.
ტენორ-საქსოფონისტი Emilio Modeste არის ნიჭიერი ახალგაზრდა მუსიკოსი უილიამსბურგიდან, ვირჯინია. თავისი ლირიკული სტილით ის არის ერთ-ერთი უდიდესი ახალგაზრდა ჯაზ-საქსის სოლისტი. მოდესტემ საქსაფონის დაკვრა რვა წლის ასაკში დაიწყო. მას დაკრული აქვს ბევრ ცნობილ მუსიკოსთან. ის ასევე იყო ”Jazz at Lincoln Center Orchestra”-ის წევრი. კლარკი თვლის, რომ მოდესტე უეინ შორტერის სკოლის ღირსეული გამგრძელებელია. ის ასევე ნიჭიერი კომპოზიტორია.
გიტარისტი Colin Cook არის შესანიშნავი მუსიკოსი, წარმოშობით მაკლინიდან, ვირჯინია. ჯაზისადმი ახალი და ამაღელვებელი მიდგომით. კუკმა დაამთავრა თორტონის მუსიკალური სკოლა რის შემდეგაც ის გახდა მოთხოვნადი არტისტი. შესრულების დახვეწილი მანერა, შესაშური ტექნიკა და მუსიკალურობა რომელიც აღაფრთოვანებს მსმენელს. დროდადრო კოლინი უკრავდა სხვადასხვა ჯგუფში, თუმცა მისი კოლაბორაცია სტენლი კლარკთან დღემდე გრძელდება და საკმაოდ წარმატებულადაც. მისი ტექნიკით აღფრთოვანებულს Al Di Meola გამახსენდა, თუმცა ამას უკვე მომავალი გვიჩვენებს.
ბექა გოჩიაშვილს კი ალბათ წარდგენაც არ უნდა. მისი კოლაბორაცია სტენლი კლარკთან წლებია უკვე მიმდინარეობს და ალბათ კიდევ დიდხანს გასტანს, რადგან ბექას შესრულების მანერა და სტილი, მრავალფეროვანი და ინდივიდუალურია. მისი ხელწერა განსხვავებულია სხვა ყველა ახალგაზრდა შესრულებლებთან შედარებით.
როგორც ავღნიშნე, საღამომ დიდებულად ჩაიარა. შესრულდა ათამდე კომპოზიცია, რომლის უმრავლესობა მსმენელისთვის ნაცნობი იყო. კონცერტი გაიხსნა ჯორჯ დიუკის არაჩვეულებრივი კომპოზიციით- Brazilian Love Affair, რომელმაც თავიდანვე განაპირობა მსმენელის კარგი განწყობა.
დარბაზში ხშირად გაიგონებდით აღფრთოვანებული მაყურებლის მოულოდნელ ოვაციას. მუსიკოსებმა მაქსიმალური დადეს. თუმცა, ქართველი მსმენელისთვის განსაკუთრებულად ამაღელვებელი იყო გია ყანჩელის ”ჰერიო ბიჭებო”, რომელიც დიდებულად შეასრულა ბექამ და რომელსაც ცრემლის გარეშე არ ჩაუვლია.
კონცერტმა ორ საათზე მეტ ხანს გასტანა. ნამდვილად არავის უნდოდა ემოციური, დამუხტული და ჯაზის ჰანგებით გაჯერებული საღამო დასრულებულიყო, თუმცა ყველაფერს აქვს დასაწყისიც და დასასრულიც. ბისზე გამოსულმა მუსიკოსებმა ცეცხლი თავიდან დაანთეს და მსმენელს კიდევ ერთხელ დაუმტკიცეს, რომ მუსიკა აბედნიერებს და ჯაზურ მუსიკაში ამ ბედნიერების მაქსიმუმი შეგიძლია შეიგრძნო.
შემდეგ იყო ინტერვიუები, ფოტოსესია და ვინილომანების საყვარელი პროცესი, ავტოგრაფის დარიგება.
ქართველ ვინილომანებს უარი არ უთხრეს დიდებულმა მუსიკოსებმა და მათ სხვადასხვა ვინილის ფირფიტის კონვერტზე დაუტოვეს მათი ანაბეჭდი.
მეორე დღეს მუსიკოსები ისევ ევროპაში დაბრუნდნენ, რათა განაგრძონ მათი დაწყებული ტურნე სხვადასხვა ქევეყანაში. ჩვენ კი ვიმედოვნოთ, რომ მალე ისევ შევხვდებით ერთმანეთს.
