კითხვაზე „რატომ უნდა შევაგროვოთ ვინილის ფირფიტის ჩანაწერები და გავხდეთ კოლექციონერი“ არის კითხვა, რომელზეც პასუხის გაცემა ადვილი არ არის, რადგან ბევრი რამ ხდის ვინილის ჩანაწერებს განსაკუთრებულს. რა თქმა უნდა, მიზეზები შეიძლება სუბიექტური იყოს, მაგრამ ფაქტია ანალოგური მუსიკა დღითიდღე პოპულარული ხდება. თუ თქვენ ვინილის ფირფიტების დიდ სამყაროში მოგზაურობის დაწყების ზღვარზე ხართ ან უბრალოდ გსურთ იცოდეთ რატომ არის პოპულარული ანალოგური ფორმატის მუსიკა, ეს ბლოგი გარკვეულწილად გაგცემთ კითხვებზე პასუხს. მაშ ასე, რატომ უნდა შევაგროვოთ ვინილის ფირფიტები? პირველი მიზეზი:
1. ვინილის ჩანაწერი უკეთესად ჟღერს ვიდრე სხვა დანარჩენი ფორმატი
ვინილის კოლექციონერების უმეტესობა იტყვის, რომ ხმის ხარისხი არის ნომერი პირველი მიზეზი, რის გამოც ისინი აგროვებენ ჩანაწერებს. ჩანაწერის ღარები შეიცავს სუფთა ანალოგურ ხმოვან ტალღებს, რომლებიც საკრავის თავაკით გაედინება გამაძლიერებელში, შემდეგ ე.წ. სფიქერებში და აღწევს თქვენს ყურამდე. ის შედარებით თბილი და რბილია ვიდრე სხვა ფორმატში მოსმენილი ჩანაწერი. CD ფლეერები, კომპიუტერები და ტელეფონები ვერ ამუშავებენ ხმას ანალოგური ფორმით. ფაილები უნდა გადაკეთდეს ციფრულში და შემდეგ ისევ ანალოგში, ამას კი შესაბამისი ტექნიკა და პროგრამები სჭირდება. ეს კი ნიშნავს იმას, რომ ვინილი არის ერთადერთი უდანაკარგო ფორმატი. რაც უფრო ნაკლებად არის კონვერტირებული აუდიო ფაილი, მით უფრო სავარაუდოა თქვენს ყურამდე მიაღწიოს ისე, რომ გზაში ხმის ხარისხი არ დაიკარგოს. ვინილი არსებითად უზრუნველყოფს პირდაპირ ხმოვან ტალღას საკრავიდან თქვენს სასმენ ორგანომდე. არსებობს უამრავი ფორმატი რომელიც შესანიშნავად ჟღერს, მაგრამ ვინილის მოსმენა სულ სხვა გამოცდილებას შეგძენთ. ის სრულიად განსხვავდება სხვა ფორმატის ჩანაწერისგან.
2. ვინილი გთავაზობთ ალბომის საუკეთესო გაფორმებას და შეფუთვას
ვინილის ფირფიტის კიდევ ერთი ღირებულება არის მისი შეფუთვა. ამ ჩანაწერებს აქვთ უფრო დიდი შეფუთვა, ვიდრე კომპაქტ-დისკებს ან კასეტებს. ჩანაწერის ჩასადებში ასევე შეგიძლიათ იპოვოთ პატარა ჩანართი ან სულაც ვაუჩერი ალბომის ელექტრონული ვარიანტის გადმოსაწერად, პლაკატი ან ბუკლეტი რომელიც შეიცავს დამატებით ინფორმაციას, მაგ. სიმღერის ტექსტებს ან ნოტებს, ფოტოებს და საერთოდ, საინტერესო ინფორმაციას შემსრულებლისა და ალბომის შესახებ. რაც შეეხება თავად ჩანაწერს, კლასიკური შავი ფერის გარდა იგი ნებისმიერი ფერის შეიძლება იყო. წითელი, ყვითელი, მწვანე, ლურჯი, იისფერი, ფერადი და ა.შ. თითქმის ყველა ფერის კომბინაცია რაც დამეთანხმებით ასევე ძალიან კარგი შესაძლებლობაა კოლექციონერისთვის ჰქონდეს მრავალფეროვანი კოლექცია. Taylor Swift- Lover-ის ვარდისფერი და ლურჯი ექსკლუზიური ვინილიდან დაწყებული, Harry Manfredini- Friday The 13th-ით დამთავრებული რომელზეც დატანილია ყალბი სისხლი და რომელიც გამოსვლიდან ძალიან მალე, მიუხედავად მისი მელოდიური სიმძიმისა, საკოლექციო ვინილი გახდა. თუმცა, მნიშვნელობა არ აქვს ვინილი რა ფერის არის. როგორც წეღან ავღნიშნეთ, მნიშვნელოვანია მისი ხარისხი, რომელსაც ყველა ფერის შემთხვევაში ინარჩუნებს.
3. ვინილი მეტია ვიდრე უბრალოდ მასზე დატანილი მუსიკა
შეიძლება ითქვას, რომ ვინილის მოსმენა მთელი რიტუალია. ასე ვთქვათ ხელით ეხები მუსიკას მის ყოველ მოსმენაზე, რასაც ვერ ვიტყოდით სხვა ფორმატში მოსმენილ მუსიკაზე. ეს ვინილის კიდევ ერთი პლიუსი და ხიბლია. ყოველ ჯერზე, როცა ჩანაწერს ყდიდან ამოიღებთ, დებთ მას თქვენს საკრავზე და ატრიალებთ, თქვენ ქმნით ძლიერ კავშირს, რომელიც სცილდება მხედველობასა და ხმას. ფიზიკური შეხება ვინილის ფირფიტასთან გეხმარებათ გააღვიძოთ თქვენში მოგონებები და ამით თქვენი ჩანაწერები ხდება უფრო მეტი, ვიდრე უბრალოდ თაროზე მოთავსებული ნივთები. თქვენი კოლექციის დალაგება სასურველი რიგითობით და კატალოგირება, კიდევ ერთ სასიამოვნო შეგრძნებას გიტოვებთ და გიღვიძებთ მეტ ინტერესს გქონდეთ საყვარელი შემსრულებლის თუ კოლექტივის ყველა ფირფიტა. ჩანაწერებმა, რომლებმაც დროს გაუძლეს, ფირფიტებმა რომლებმაც თქვენადე მოაღწია არის მთელი ისტორია, რომელიც შენი ცხოვრების ერთგვარი მეგზური ხდება და შენც თითქოს ამ ისტორიის ერთი პატარა ნაწილი ხარ. პირადად მე ხანდახან სპეციალურად არ დამიბრუნებია ვინილი თავის ადგილზე, ქაოტურად ჩამიდია სხვადასხვა თაროზე, რათა შემდეგ მიზეზი მომცემოდა დამელაგებინა, რათა კიდევ ერთხელ შევხებოდი სხვადასხვა ისტორიას. დიახ, ვინილის ფირფიტა მეტია ვიდრე უბრალოდ მასზე დატანილი პატარა ღარები, რომელიც ხმას გამოსცემს.
4. ვინილის ყიდვა მუსიკოსების მხარდასაჭერად შესანიშნავი გზაა
და არა მხოლოდ მუსიკოსების. როგორც ანდერგრაუნდ, ისე მეინსტრიმ მუსიკაში, არტისტები და ლეიბლები ყოველ წელს ახდენენ ვინილის ჩანაწერების მნიშვნელოვანი რაოდენობის გამოშვებას. ყოველ ჯერზე, როცა ყიდულობთ წინასწარ შეკვეთას ან იღებთ ჩანაწერს მისი გამოშვების შემდეგ, ამ მუსიკის შემქმნელებსა და მწარმოებლებს უფლებას აძლევთ განაგრძონ ალბომების გამოშვება. თუ ეწვევით ადგილობრივ მაღაზიებს ან შეუკვეთავთ ონლაინ მაღაზიებიდან, თქვენ ეხმარებით ამ ბიზნესს, რომ განვითარდეს და კიდევ მეტი ენთუზიაზმით აკეთოს თავისი საქმე ამ პროცესში ჩართულმა ნებისმიერმა რგოლმა. ეს ერთგვარი ჯაჭვია, რომელიც არასდროს უნდა გაწყდეს. თქვენი მხარდაჭერა ძალიან ბევრს ნიშნავს იმ შემსრულებლებისთვის, ლეიბლებისა თუ მაღაზიებისთვის, რომლებიც თავს არ ზოგავენ, რათა თქვენი შეხება მუსიკასთან უფრო მეტად საინტერესო გახდეს. ნებსით თუ უნებლიეთ, თქვენც ამ დიდი ჯაჭვის ერთ-ერთი რგოლი ხდებით და საკმაოდ მნიშვნელოვანიც კი.
5. ვინილი ”გაიძულებთ” შეუერთდეთ კოლექციონერ საზოგადოებას
ნებისმიერი სხვა ჰობის მსგავსად, აქაც ვერ იქნებით მარტო. ვინილის ჩანაწერების შეგროვება გაძლევთ საშუალებას იყოთ ამ საზოგადოების ნაწილი. ჩანაწერების მაღაზიები ან საიტები როგორიცაა vinili.ge ან პეგას აუდიო, ასევე ფეისბუქ გვერდები ”ვინილომანია” და ”ვინილების შავი ბაზარი”, არის საზოგადოების ცენტრები, სადაც მუსიკის მოყვარულ ვინილომანებს შეუძლიათ შეიკრიბონ და გაუზიარონ ინფორმაცია თავიანთი საყვარელი ჩანაწერების და უახლესი აღმოჩენების შესახებ. როდესაც თქვენ ეხებით საერთო ვნებას ჩანაწერების კულტურისადმი, ყალიბდება ურთიერთობები, რომელიც სულ სხვანაირია და არ ჰგავს ნებისმიერ სხვა საზოგადოების ურთიერთობებს. ჯეთ როთალი თუ ზაპა? ”Abbey Road” თუ ”Yesterday And Today”? მონკი თუ ევანსი? მსგავს დისკუსიას ხშირად მოისმენთ ამ დიდებულ საზოგადოებაში და თქვენც თანდათან ერთვებით ამ პროცესში, იძენთ გამოცდილებას და თანდათან შედიხართ აზარტში. შედიხართ ერთგვარ კაზინოში, რომელსაც ”ვინილომანობა” ჰქვია და საიდანაც თავის დაღწევა შეუძლებელია. არსებობს მილიონობით ჩანაწერი და ფირფიტა, ასე რომ თქვენ არასოდეს მოგაკლდებათ ის, რაც უნდა გაიგოთ, აღმოაჩინოთ და გაუზიაროთ ჩანაწერების შემგროვებელ თქვენს მეგობრებს!
მგონი, საკმარისია ეს 5 მიზეზი იმისთვის, რომ გახდეთ ვინილის ფირფიტების კოლექციონერი. თუმცა გაითვალისწინეთ, რომ ნებისიმერი რამის კოლექციონერობა არ არის იაფი ჰობი და არც ვინილის კოლექციონერობაა გამონაკლისი. ჩვენი რჩევაა არ აჩქარდეთ. ნელ-ნელა, ნაბიჯ-ნაბიჯ შეგიძლიათ თქვენი ჩანაფიქრი რეალურად აქციოთ. დაიწყეთ თქვენი საყვარელი შემსრულებლიდან და შემდეგ თავად მიხვდებით როგორ მოიქცეთ. აღმოსაჩენი უამრავია. ეს ხომ მუსიკაა, რომელიც დაუსრულებელია და ეს ხომ ვინილია, რომელსაც ანალოგი არ გააჩნია. ჩვენ კი ჩვენის მხრივ მაქსიმალურად დაგეხმარებით თქვენი ჰობი რეალურად აქციოთ.
წარმატებებს გისურვებთ
