არსებობს რამდენიმე მიზეზი, რის გამოც შეიძლება თქვენი საკრავი უკრავდეს უცნაურად, არათანაბრად, ჩანაწერი ჟღერდეს ცუდად ან დამახინჯებულად. ქვემოთ განვიხილავთ თითოეულ მიზეზს და მოგცემთ რჩევებს, თუ როგორ უნდა მოაგვაროთ ესა თუ ის პრობლემა, რათა მაქსიმალურად ხარისხიანი ხმით მოისმინოთ ჩანაწერები
ჩანაწერი ცუდად, უცნაურად ან დამახინჯებულად შეიძლება ჟღერდეს ამ ხუთი პრობლემის გამო:
1. ნემსი (aka Stylus) არის ჭუჭყიანი, გაცვეთილი ან გატეხილი და საჭიროებს შეცვლას.
2. საკრავი არ დგას თანაბარ ზედაპირზე და იწვევს ვინილზე შიდა ღარების დამახინჯებას.
3. ღვედი, რომელიც ვინილს ატრიალებს არის მოშვებული და საჭიროებს შეცვლას.
4. საკრავი არ არის სათანადოდ დამიწებული და იწვევს გუგუნის ან ზუზუნის ხმებს.
5. საკრავში ჩამონტაჟებული პრეგამაძლიერებელი არასწორ პარამეტრზეა დაყენებული.
წაიკითხეთ ქვემოთ მოცემული ინსტრუქციები, თუ როგორ უნდა მოაგვაროთ ზემოთ ჩამოთვლილი თითოეული პრობლემა.
1. ნემსი (aka Stylus) არის ჭუჭყიანი, გაცვეთილი ან გატეხილი და საჭიროებს შეცვლას
აუდიო პრობლემების უმეტესობა საკრავებზე არის ძველი ან გატეხილი სტილუსი (ანუ ნემსი). დააკვირდით კარტრიჯზე არსებულ ნემსს და თუ ის მარცხნივ ან მარჯვნივ არის გაღუნული, გატეხილია და უნდა შეიცვალოს. დამერწმუნეთ, თქვენ ვერ შეძლებთ მის თითით გასწორებას, რადგან სტილუსი ძალიან მყიფეა და ის დიდი ალბათობით უბრალოდ მოტყდება.
იმ შემთხვევაში თუ ჩანაწერის მოსმენისას ერთ არხში აუდიო დაიკარგა ან დროდადრო იკარგება, ამ შემთხვევაშიც პირველ რიგში სტილუსს უნდა შევხედოთ. დიდი ალბათობით ის გაღუნულია, არასწორად დგას და მხოლოდ ერთ შესაბამის არხში გამოსცემს ხმას.
თუ ხმა არის ორივე არხში მაგრამ ბუნდოვანი და დამახინჯებულია ე.ი. ნემსას მტვერი აკრავს გარშემო. მტვერი ბლოკავს აუდიო სიგნალს დინამიკებთან მისვლაში და რა თქმა უნდა მახინჯდება.
თუ სტილუსი მტვრიანია თითით ნუ შეეხებით, თორემ არის შანსი გაღუნოთ, დახაროთ ან სულაც მოტეხოთ ბუდიდან. არსებობს სპეციალური ჟელე და ჯაგრისი, რომლითაც შეგიძლიათ მოაშოროთ მტვერი, თუმცა აქაც დიდი სიფრთხილეა საჭირო.
2. საკრავი არ დგას თანაბარ ზედაპირზე და იწვევს ვინილზე შიდა ღარების დამახინჯებას
ხანდახან არის შემთხვევა, რომ თითქოს ყველაფერი კარგად არის. ნემსაც სუფთაა, აუდიო სისტემაც გასწორებულია, მაგრამ სტილუსიდან გამოსული ხმა არ მოგვწონს. ამის კიდევ ერთი მიზეზი შეიძლება იყოს საკრავის არასწორი დგომა. მაგალითად წინ ან გვერდით არის გადახრილი, რაც იწვევს ნემსის არასწორ პოზიციაში დგომას ფირფიტის ღართან მიმართებაში. თითქმის ყველა საკრავს აქვს ფეხის სარეგულირებელი. თუ ზედაპირი არასწორია ან თავად მაგიდა რაზეც დევს საკრავი არასწორად დგას, ამ ფეხების და სპეციალური თარაზოს საშუალებით შეგიძლიათ გაასწოროთ. გასწორებული საკრავი უზრუნველყოფს, სტილუსის მხოლოდ წვერი დაუკავშირდეს ვინილის ღარს და გამოსცეს საუკეთესო ხმა.
3. ღვედი, რომელიც ვინილს ატრიალებს არის მოშვებული, არ მუშაობს სათანადო სიჩქარით და საჭიროებს შეცვლას
როგორც ჩვენს ერთ-ერთ წინა ბლოგში ავღნიშნეთ, არსებობს ორი სახის საკრავი. ღვედით მართული (Belt-drive turntables) და პირდაპირ ამძრავიანი (Direct-drive turntables), რომელიც უშუალოდ არის დაკავშირებული საკრავის თეფშთან. თუ თქვენი საკრავი არის ღვედით მართული, შეამოწმეთ და დარწმუნდით, რომ ის ვარგისია. ღვედები შეიძლება დროთა განმავლობაში მოეშვას ან გაიწელოს, რაც გამოიწვევს საკრავის თეფშის არასტაბილურ ტრიალს, რაც თავის მხრივ აისახება ხმის ხარისხზე. თუ აუდიო გესმით რხევებით ან შენელებულად ეს იმას ნიშნავს, რომ ღვედია გამოსაცვლელი.
იმის დასადგენად არის თუ არა თქვენი საკრავი ღვედით მართული, შეამოწმეთ საკრავის სახელმძღვანელო ან მოიძიეთ ინფორმაცია ინტერნეტით თქვენი საკრავის მოდელის მიხედვით ან სულაც თქვენით შეამოწმეთ.
რაც შეეხება ღვედის ადგილმდებარეობას, მისი პოვნა ძალიან ადვილია. როგორ შევამოწმოთ? ამისთვის უნდა ავიღოთ საკრავის თეფშიდან დამცავი ხალიჩა და ფრთხილად ამოვწიოთ თეფში. თუმცა, სჯობს ქვემოთ მოცემულ ვიდეოს უყუროთ და ნახოთ ერთ-ერთი მაგალითი, თუ როგორ გამოცვალოთ ან შეამოწმოთ ღვედის ვარგისიანობა.
4. საკრავი არ არის სათანადოდ დამიწებული და იწვევს გუგუნს ან ზუზუნს
ერთი შეხედვით თითქოს არაფერია, თუმცა დამიწების გარეშე სისტემის ქონა ძალიან დიდი რისკია. ყველაფერს რომ თავი დავანებოთ, ჩანაწერის სმენის დროს შეიძლება ზედმეტმა ხმებმა შეგვაწუხოს. ესენია ზუზუნი ან გუგუნი. ერთადერთი გამოსავალი დამიწებაა, რომელსაც თუ სწორად გააკეთებთ, ეს პრობლემა სამუდამოდ მოგეხსნებათ. დამიწების შესახებ დაწვრილებით ჩვენს მომდევნო ბლოგში მოგახსენებთ, რადგან ეს არც თუ ისე პატარა თემაა.
5. საკრავში ჩამონტაჟებული პრეგამაძლიერებელი არასწორ პარამეტრზეა
ხშირად წამიკითხავს სხვადასხვა ჯგუფში, რომ ”საკრავი ძალიან დაბალ ხმას გამოსცემს, არადა ყველაფერი წესრიგშია”. ეს ყველაზე გავრცელებული და ამავდროულად, ყველაზე ადვილად მოგვარებადი ”პრობლემაა”. თუ ყველაფერი წესრიგშია, მაშინ რა ხდება?
როდესაც ყიდულობთ ახალ საკრავს ჩაშენებული წინასწარი გამაძლიერებლით ე.წ. პრეამპით, უნდა შეამოწმოთ ხმის სისტემაზე დაერთებისას არის თუ არა სწორ პარამეტრზე დაყენებული. თუ საკრავს პრეამპი დაყენებული აქვს პარამეტრზე „Line“, რომელიც თავის მხრივ გამაძლიერებელს უკავშირდება RCA კაბელებით „Phono“ მიმღებში, ეს პარამეტრი გამოიწვევს ბგერის დამახინჯებას დაკვრის დროს.
რომ არ დაგაბნიოთ, ჩვენ გვაქვს ორი ვარიანტი.
პირველი: საკრავი, გამაძლიერებელი და ე.წ. პასიური სფიქერები (გამაძლიერებლის გარეშე)
და მეორე: საკრავი და ე.წ. აქტიური სფიქრები (ჩაშენებული გამაძლიერებლით)
პირველ ვარიანტში დაერთების თანმიმდევრობა და პარამეტრები შემდეგნაირია. საკრავი დაყენებულია „Phono“ პარამეტრზე, RCA კაბელებით დაკავშირებულია გამაძლიერებელთან ასევე „Phono“ შემსვლელში და შემდეგ გამაძლიერებლიდან კაბელით მიდის სფიქერებამდე.
მეორე ვარიანტში საკრავი დაყენებულია “Line” პარამეტრზე და RCA კაბელებით დაავშირებულია აქტიურ სფიქერებზე ან აუქსზე. კომბინირებული გამაძლიერებლის შემთხვევაში კი RCA კაბელი შეგიძლიათ დააერთოთ ნებისმიერ შემსვლელზე და არ აქვს მნიშვნელობა ეს იქნება CD, Tape, TV, Line და ა.შ.
მედი გვაქვს მცირედით მაინც დაგეხმარათ ჩვენი რჩევები და დარწმუნებულები ვართ, რომ სწორი პარამეტრების შემთხვევაში მიიღებთ საუკეთესო ხმის ხარისხს, რომელიც ყველა ვინილომანისთვის ძალიან მნიშვნელოვანია.
