28-29-30 ივნისს, არტოს ბაღში გაიმართა რიგით მეხუთე Midsummer Nights Jazz Fest, რომლის ორგანიზატორიც გახლავთ ZMG-Art. ფესტივალს საკმაოდ ბევრი მონაწილე და მაყურებელიც ჰყავდა. სამწუხაროდ ჩვენ მხოლოდ ერთ საღამოს დავესწარით, თუმცა ამ ერთი საღამოდანაც კარგად ჩანდა თუ როგორი მრავალფეროვანი და ენერგიული ფესტივალი იყო წლევანდელი ”მიდსამარი”. წელს, ცნობილ მუსიკოსებთან ერთად ფესტივალის სცენაზე გამოჩნდნენ დამწყები, ძალიან საინტერესო მუსიკოსები და ბენდები. ასევე, წელს „ზაფხულის ღამის ჯაზის“ სპეციალური სტუმრები იყვნენ ამერიკელი ჯაზ მუსიკოსები.
საფესტივალო დღის ბოლო გამომსვლელი დათო კაკულიას სექსტეტი გახლდათ.
ზუკა სიმონიშვილი- გიტარა
თორნიკე აბულაძე- ალტ საქსოფონი
დიტრიხა (დიმიტრი ლეკვეიშვილი)- ტენორ საქსოფონი
სოსო ცაგარეიშვილი- დრამი
ბასმენა (დავით გოგისვანიძე)- ბასი
დათო კაკულია- კლავიში
სპეციალური სტუმარი- ნოდარიკო ხუციშვილი
ბიჭებმა ოთხი კომპოზიცია დაუკრეს. ორი ძველი EP-დან ”ჭაჭა მოუდი” და ”Drunk Junky-monkey”, ერთი ახალი- ”ალილუია” და ერთიც ნოდარიკო ხუციშვილთან ერთად- ”ქალაქის რიტმები”. ჯაზის, ფანკის, ჰიპ-ჰოპის და სოულის ნაზავი მუსიკა და 20 წუთი სრული კაიფი. ეს ის იყო, რამაც ნამდვილად დააგვირგვინა ფესტივალის მეორე დღე. პირდაპირი მნიშვნელობით ცეცხლი ენთო სცენაზე. რიტმულ და მუსიკალურ ნაწილს თავი რომ დავანებოთ, შესრულების უმაღლესი კლასი გვაჩვენეს. ერთგვარი მასტერკლასი ჩაგვიტარეს იქ მყოფებს. მუსიკოსები საოცრად გრძნობდნენ ერთმანეთს. იმპროვიზაციის უდიდესი ნიჭი და მაჟორული მუსიკა იფრქვეოდა სცენიდან. მოკლედ რომ ვქვათ: ჩაგვიტარეს…
კიდევ ერთხელ დავრწმუნდი ამ და მსგავსი ფესტივალების აუცილებლობაზე. სწორედ მსგავს ფესტივალებზე ხდება აღმოჩენები. პირადად ჩემთვის დათო კაკულია, ბასმენა (დავით გოგისვანიძე) და თორნიკე აბულაძე მართლა აღმოჩენა გახლდათ. შეიძლება ჩანაწერი მოისმინო და მოგეწონოს, თუმცა ლაივში ეს სულ სხვა შეგრძნება და კაიფია. პირდაპირ უყურებ რა შეუძლიათ ერთი იდეის ქვეშ გაერთიანებულ ადამიანებს, რომლებიც მაქსიმუმს აკეთებენ, რათა თავიანთი ნააზრევი და ნაშრომი შენამდე მოიტანონ და გაზიარონ უდიდეს სიამოვნებას. ყველაზე კარგი კიდევ ამ ყველაფერში არის, ის რომ ბიჭები სხვადასხვა ბენდებში უკრავენ. მსგავსი გამოცდილება მუსიკოსს ძალიან ზრდის პროფესიული თვასაზრისით და ეს ეტყობოდათ კიდეც სცენაზე მდგარ მუსიკოსებს.
”ზაფხულის ღამის ჯაზ-ფესტივალი” ერთი წლით დაგვემშვიდობა. კიდევ ერთხელ დიდი მადლობა ორგანიზატორებს ამ არაჩვეულებრივი ფესტივალისთვის. გვინდა წარმატებები ვუსურვოთ და კიდევ უფრო მეტი მაშტაბი მომავალ წელს.