დიდებული ჰენრი მანჩინი

ენრიკო ნიკოლა მანჩინი- ამერიკელი კომპოზიტორი, დირიჟორი, პიანისტი და ფლეიტისტი. კომპოზიტორი, რომელმაც თავი დაგვამახსოვრა უამრავი ფილმის, მულტფილმის თუ სატელევიზიო შოუს მუსიკალურად გაფორმებით.

”სიყვარულის ისტორია”, ”ვარდისფერი პანტერა”, ”საუზმე ტიფანისთან”, ”დიდი რბოლა”, ”ტომი და ჯერი”, ”არაბესკა”, ‘’შარადა’’, ”დიდებული ვალდო პეპერი”… ეს, იმ ფილმების უმცირესი ჩამონათვალია, რომლისთვისაც მანჩინიმ მუსიკა დაწერა.

იტალიელი ემიგრანტის ოჯახში დაბადებულმა მანჩინიმ, 8 წლის ასაკში პიკოლოზე დაკვრის სწავლა დაიწყო. ფილმმა ‘’The Crusades’’  შთააგონა მანჩინი გამხდარიყო კომპოზიტორი, მიუხედავად მამამისის სურვილისა, ყოფილიყო მასწავლებელი. მანჩინის მშობლები წარმოშობით იტალიელები იყვნენ. ამერიკაში ემიგრაციამ მათზე მთლად კარგი გავლენა ვერ იქონია. იტალიაში წარმატებული მეწარმე, ამერიკაში ფოლადის ქარხნის მუშად იქცა. ოსკაროსან კომპოზიტორს მამამისი საყვედურობდა რომ არ დაუჯერა. მისი აზრით, უნივერსიტეტი რომ დაემთავრებინა პროფესორი გახდებოდა. 

12 წლის ასაკში მანჩინიმ პიანინოს და არანჟირების შესწავლა დაიწყო პიტსბურგელ პიანისტისთან და დირიჟორ მაქს ადკინსთან, რომელიც პარალელურად Stanley Theatre-ის დირიჟორი იყო. ჰენრიმ ამ თეატრში საკმაოდ დიდი გამოცდილებაც მიიღო.  

სკოლის დამთავრების შემდეგ, მანჩინიმ თავის პირველ სახელად ჰენრი აირჩია და კარნეგის ტექნოლოგიურ ინსტიტუტში ჩააბარა, ხოლო მოგვიანებით გადავიდა ჯულიარდის მუსიკალურ სკოლაში, სადაც გამოცდაზე ბეთჰოვენის ერთ-ერთი სონატა და კოლ პორტერის ცნობილი “Night and Day” შეასრულა. იმის გამო, რომ ორკესტრირებისა და კომპოზიციის კურსების გავლა მხოლოდ მეორე კურსზე შეეძლო, მანჩინი პირველ კურსზე მხოლოდ ფორტეპიანოს სწავლობდა. მანჩინის ამ მდგომარეობას მისმა ბიოგრაფმა ჯონ ქეფსმა უწოდა ‘’უმიზნო და დაჩაგრული – შორს არის ადკინსის დამცავი გარემოსგან’’. 

ჯულიარდის სკოლის დასრულებისთანავე, მანჩინი ირიცხება ამერიკის არმიის საჰაერო ძალებში, სადაც ხვდება რამოდენიმე მუსიკოსს, რომლებიც უკრავდნენ გლენ მილერთან. სწორედ მათი დამსახურებით მანჩინი ხდება ‘’გლენ მილერის საჰაერო ძალების ბენდი’’-ს წევრი, სადაც პიანისტობის გარდა იყო არანჟირებების ავტორიც.

ამის შემდეგ იწყება მანჩინის დიდებული გზა კინოსკენ და ერთ-ერთ მოთხოვნად კინოკომპოზიტორად იქცა. მის მიერ დაწერილი  “Moon River” ფილმისთვის ‘’საუზმე ტიფანისთან’’, სადაც არაჩვეულებრივი ოდრი ჰეპბერნი თამაშობს, მანჩინის პირველი ოსკარი მოუტანა და ისეთი პოპულარული გახდა, რომ გრამფირფიტაზე მისი ათასამდე სხვადასხვა ვარიანტი გამოიცა. 

მისი ოჯახის ემიგრაციას უკვალოდ ნამდვილად არ ჩაუვლია. მარტინ რითის ფილმისთვის ‘’მოლი მაგუაიერსი’’ მან არაჩვეუებრივი და გულში ჩამწვდომი მუსიკა დაწერა. ფილმის სიუჟეტი ირლანდიელ ემიგრანტებზეა, რომლებიც მაღაროში მუშაობენ. Molly Maguires იყო ირლანდიელი ქვანახშირის მაღაროელების საიდუმლო ორგანიზაცია, რომელიც შეიქმნა მეცხრამეტე საუკუნეში პენსილვანიაში, რათა ებრძოლათ მაღაროების მჩაგვრელი მფლობელების წინააღმდეგ. ასევე, მანჩინის მეუღლე გახლდათ ირლანდიელი ემიგრანტი, მომღერალი ჯინი ოკონორსი, რომელიც ასევე გახლდათ გლენ მილერის ორკესტრის წევრი და რომელთან ერთადაც 47 წელი გაატარა. 

საბოლოო ჯამში ჰენრი მანჩინის ასამდე ფილმისთვის აქვს მუსიკა დაწერილი და ორმოცდაათამდე სტუდიური ალბომი გამოშვებული. არის 20 გრემის და 4 ოსკარის მფლობელი. წარდგენილი იყო ემის ნომინაციაზე და მოგებული აქვს ერთი ოქროს გლობუსი.

2001 წელს, ამერიკის კომპოზიტორთა, ავტორთა და გამომცემელთა საზოგადოებამ (ASCAP) დააარსა ჰენრი მანჩინის მუსიკალური სტიპენდია, რომელიც ყოველწლიურად გაიცემა. 2004 წლის 13 აპრილს აშშ-ს საფოსტო სამსახურმა გამოსცა 37 ცენტიანი სამახსოვრო საფოსტო მარკა, სადაც გამოსახულია მანჩინი, თუ როგორ დირიჟორობს მისი ყველაზე პოპულარული ფილმებისა და სატელევიზიო თემების სიის წინ, ხოლო ქვედა მარცხენა კუთხეში ვარდისფერი პანტერა მიუთითებს მანჩინისკენ.