ჯონ ბირკსი გილესპი, მეტსახელად დიზი. დაიბადა 1917 წლის 21 ოქტომბერს, ჩეროში, სამხრეთ კაროლინაში. მამამისი, ჯეიმს გილესპი იყო ერთ-ერთი ადგილობრივი ბენდის წევრი, ამიტომ დიზის ბავშვობიდან ჰქონდა მუსიკალურ ინსტრუმენტებზე წვდომა. ოთხი წლის ასაკში ის იწყებს პიანინოს, ხოლო თორმეტი წლის ასაკში უკვე ტრომბონის და საყვირის დაკვრას. ერთ საღამოს, რადიოს სმენისას მან როი ელდრიჯს მოუსმინა და მას შემდეგ ოცნებობდა გამხდარიყო ჯაზ მუსიკოსი. მიუხედავად იმისა, რომ ის სიღარიბეში ცხოვრობს, ახერხებს სტიპენდიის მიღებას ლაურინბურგის ინსტიტუტში, ჩრდილოეთ კაროლინაში, თუმცა 2 წლის შემდეგ მთელი ოჯახი გადადის ფილადელფიაში.
მისი პირველი პროფესიონალური სამსახური იყო ფრენკი ფეირფაქსის ორკესტრში, რომელსაც ის 1935 წელს შეუერთდა. ამავე წელს აკეთებს თავის პირველ ჩანაწერს ”ტედი ჰილ ჯგუფში”, რომელშიც ის ცვლის ფრენკი ნიუოტნს. 30 -იანი წლების ბოლოს, გილესპი გამოირჩეოდა ტედი ჰილლის, ლაკი მილინდერის, კაბ კალოუეის, ჯიმი დორსის და ლიონელ ჰემპტონის ორკესტრებში, როგორც როი ელდრიჯის ერთ -ერთი საუკეთესო მიმდევარი. იმ წლების განმავლობაში იგი შეხვდა რამდენიმე კოლეგას, რომლებმაც შთააგონეს მას უფრო თანამედროვე სტილის დამუშავება.
40 -იანი წლების დასაწყისში მან დაიწყო ნიუ -იორკის ღამის კლუბ Minton’s Playhouse–ში დაკვრას. ბასისტ ოსკარ პეტიფორდთან და დრამერ კენი კლარკთან ერთად მან ჩამოაყალიბა ჯგუფი, რომელიც მოგვიანებით ლეგენდარული გახდა. მინტონის საღამოს ჯემ-სესიები გახდა პლაცდარმი თანამედროვე ჯაზის ზოგიერთი დიდი სახელისათვის. მათ შორის თელონიუს მონკის, ბად პაუელის, მაქს როუჩისა და ჩარლი კრისტიანისთვის. შეგვიძლია ვთქვათ, რომ სწორედ აქ დაიბადა ბიბოპის სტილი.
1947 წელს გილესპიმ ჩამოაყალიბა კვინტეტი პიანისტ ჯონ ლუისთან, მილტ ჯექსონთან, კენი კლარკთან და რეი ბრაუნთან ერთად. პარალელურად, გილესპი უკრავს პატარა ანსამბლებშიც, მაგრამ უპირატესობას ანიჭებს დიდ ანსამბლებს, სადაც შეუძლია ლიდერის ხასიათი გამოავლინოს. სადაც გამოირჩევა როგორც სოლისტი და ამავე დროს, როგორც მსახიობი. მისი ხალისიანი ქცევები და იუმორი, კონცერტებს სულ სხვა იერს სძენდა და ხდება მისი ცოცხალი სპექტაკლების დამახასიათებელი ნიშანი. 40-იანი წლების ბოლოს დიზი გილესპი დაინტერესდა სამხრეთ ამერიკული მუსიკით. აფრო-კუბური რიტმების ჩართვა ჯაზ-ბენდის კონტექსტში არის ერთ-ერთი პირველი წარმატებული მცდელობა სხვადასხვა ჟანრის შერწყმისა. ამ წლების მნიშვნელოვანი კომპოზიციებია ”Manteca Theme” და ”Tin Tin Deo”.
1964 წლის აშშ-ს საპრეზიდენტო არჩევნებში, მან საკუთარი თავი წარადგინა შეერთებული შტატების პრეზიდენტობის კანდიდატად. ხალხს დაჰპირდა, რომ „თეთრ სახლს“ გადაერქმეოდა სახელი და დაერქმეოდა „ლურჯი სახლი“. ასევე, განაცხადა, რომ დიუკ ელინგტონს დანიშნავდა სახელმწიფო მდივანის თანამდებობაზე, მაილს დეივისს CIA-ს ხელმძღვანელად, მაქს როუჩი თავდაცვის მდივანი იქნეოდა, ჩარლზ მინგუსი მშვიდობის მდივანი, რეი ჩარლზი კონგრესის ბიბლიოთეკის ხელმძღვანელი, ლუი არმსტრონგი სოფლის მეურნეობის მისნისტრი, მერი ლუ უილიამსი ელჩი ვატიკანში, თელონიუს მონკი კი მოგზაური ელჩი და მალკოლმ X გენერალური პროკურორი.
1979 წელს მან გამოსცა ავტობიოგრაფიული წიგნი „იყოს თუ არა“. 80 -იან წლებში ხელმძღვანელობდა გაეროს ორკესტრს. იყო იტალიის ხშირი სტუმარი. ქალაქი ბასანო დელ გრაპა აძლევს მას საპატიო მოქალაქეობას, სადაც მან დააარსა პოპულარული მუსიკის ადგილობრივი სკოლა, რომელიც ახლაც მის სახელს ატარებს. დიზი გილესპი პანკრეასის კიბოთი 1993 წლი 6 იანვარს, 75 წლის ასაკში გარდაიცვალა.