დღე პირველი- მირო ჰერაკი და დენიელ ბულატკინი. ბილ ფრიზელის ტრიო
რიგით 27-ე Tbilisi Jazz Festival 22 მაისს, რუსთაველის ეროვნული თეატრი-ში გაიხსნა და სამ დღეს გასტანა. საღამო ორ ნაწილად იყო წარმოდგენილი. პირველ ნაწილში, მსმენელის წინაშე წარდგა Miro Herak და Daniel Bulatkin პროექტით- „ერისიუმი“, ხოლო საღამო დაასრულა Bill Frisell-ის ტრიომ.
საღამო საკმაოდ დატვირთული იყო ემოციებით. ჩეხმა მუსიკოსებმა მირო ჰერაკმა და დენიელ ბულატკინმა სიურპრიზად რევაზ ლაღიძის- ”თბილისო” შემოგვთავაზა, ხოლო ბილ ფრიზელის ტრიომ სრული შოკი მოახდინა მსმენელზე. გაწონასწორებული, დაბალანსებული, ზღაპრული და ემოციური- მოკლედ შეიძლება ასე დავახასიათოთ ეს არაჩვეულებრივი ტრიო. მუსიკაც თითქოს სადღაც შორიდან, თითქოს გულიდან მოდიოდა. ერთგვარად ზღვის ტალღებს შევადარებდი, რომელიც გაგიტაცებს და შემდეგ უკან გაბრუნებს.
ცალკე აღებული ყველა ეს ტრეკი რა თქმა უნდა სასიამოვნოდ მოსასმენია, თუმცა კომპოზიციების თანმიმდევრობა დრამატურგიულად ძალიან კარგად იყო აწყობილი და ალბათ ესეც მატებდა კონცერტს მეტ ხიბლს. ასეთი ემოციური საღამო დიდი ხანია არ გამართულა თბილისში და ალბათ საქართველოშიც.
დღე მეორე- ჯონ პატიტუჩი, ჯოი კალდერაცო და დეივ ვექლი
ფოტოებზე ხედავთ სამ თითქმის არაფრით გამორჩეულ ადამიანს. ვიზუალურად ისინი მშვიდად გამოიყურებიან, ნორმალურ ადამიანებს გვანან, თუმცა ამ სამმა ”ნორმალურმა” კაცმა 23 მაისს, • რუსთაველის ეროვნული თეატრი-ის სცენაზე ისეთი არანორმალური ცეცხლი დაანთეს, რომ დენის ძაბვამ ვერ გაუძლო და წუთიერად გაითიშა.
ამ არაჩვეულებრივ ტრიოს წარმოადგენდა John Patitucci, Joey Calderazzo და Dave Weckl. გუშინდელი საღამო იყო უდიდესი ზეიმი. ერთდროულად ენერგიული, მრავალფეროვანი და სიურპრიზებით აღსავსე, აი ისეთი, ნამდვილ ჯაზ-ფესტივალს რომ შეეფერება. კიდევ ერთხელ დავრწმუნდი, რომ მუსიკას სასწაულების მოხდენა შეუძლია. თითქოს გამქრალი იყო ყველანაირი ზღვარი მსმენელს და შემსრულებლებს შორის. დავარდნილი ძაბვა სადენებში და ამაღლებული ემოცია. მუსიკოსებმა კიდევ ერთხელ დაამტკიცეს თავისი პროფესიონალზმი და კიდევ ერთხელ თქვეს თავისი სათქმელი. ტრიოს აყოლილი მსმენელი და ზღვა ემოცია. ასეთი იყო მეორე დღე Tbilisi Jazz Festival-ის სამ დღიანი ეპოპეადან.
დღე მესამე- სთეისი კენტი
ბრიტანეთის ჯაზის ჯილდო 2001
ბი-ბი-სის ჯილდო საუკეთესო ვოკალისთვის 2002
გრემის ჯილდო საუკეთესო ვოკალური ალბომისთვის 2006
იაპონიის ჯაზის ჯილდო საუკეთესო ვოკალური ალბომისთვის 2018 და ეს არ არის სრული სია…
17 სტუდიური ალბომი, უამრავი სინგლი და კოლაბორაცია სხვადასხვა მუსიკოსებთან. 2 მილიონი გაყიდული ალბომი. ეს Stacey Kent-ია
„სთეისი კენტი… აქცევს სიმღერებს ვნებით, რომანტიკითა და საოცრებებით სავსე მოთხრობებად. მიენდეთ მის მოკრძალებულ ისტორიებს და კენტი გაგიხსნით სამყაროს.” – ჟურნალი New Yorker
დიახ, ეს არაჩვეულებრივი ქალბატონი, გუშინ რუსთაველის თეატრის სცენაზე იდგა და ქართველ თუ უცხოელ მსმენელს ატკბობდა თავისი ჯადოსნური ხმით. საათნახევრიანი წარმოდგენა, დარბაზში ბუზის გაფრენის ხმა, ზღაპრული გარემო და ბისზე შესრულებული რამოდენიმე სიმღერა. სულ ვამბობდი, რომ რუსთაველის თეატრი არ არის ის ადგილი, სადაც გიჟური ჯაზური საღამოები უნდა მოეწყოს, თუმცა სთეისი კენტმა ეს აკადემიური გარემო თავისი არჩავეულებრივი ხმით კიდევ უფრო ზღაპრულ სამყაროდ გადააქცია. ისეთი შეგრძნება დამიტოვა, თითქოს სპეციალურად ააშენეს რუსთაველის სცენა ამ დღისთვის. საოცრად მოუხდა სთეისი და • რუსთაველის ეროვნული თეატრი ერთმანეთს.
საღამოზე მსმენელისთვის ცნობილი თუ უცნობი კომპოზიციები შესრულდა სთეისის სხვადასხვა ალბომიდან.
მასთან ერთად სცენაზე იდგა ორი არაჩვეულებრივი მუსიკოსი, პიანისტი არტ ჰირაჰარა და მისი მეუღლე და პროდიუსერი, საქსოფონისტი- ჯიმ ტომლინსონი, რომელიც გახლდათ შესრულებული კომპოზიციების არანჟირების ავტორი.
საღამოს არ აკლდა აპლოდისმენტები. მაყურებელი ბოლომდე ჩაიძირა ძალიან მსუბუქ და სასიამოვნო ჯაზის და ბოსას რიტმებში. სთეისის ჯადოსნური ვოკალის, ჯიმის განუმეორებელი საქსოფონის და ჰირაჰარას არაჩვეულებრივ იმპროვიზაციებში.
აი ასე დასრულდა წლევანდელი Tbilisi Jazz Festival, რომელიც Eastern Promotions / ისთერნ პრომოუშენსი–ს თავდაუზოგავი შრომით, ყოველ წელს იმართება თბილისში და ჯაზის მოყვარულებს გვჩუქნის არაჩვეულებრივ საღამოებს. დიდი მადლობა ჯაზ-ფესტივალის ორგანიზატორებს, რომლებიც გვაძლევენ საშუალებას ჩვენი საყვარელი მუსიკოს-შემსრულებლები ცოცხლად მოვისმინოთ. ასევე, დიდი მადლობა სცენაზე მდგარ მუსიკოსებს ამ დიდებული საღამოებისთვის. ფესტივალი შედგა. ჩვენ ისღა დაგვრჩენია, დაველოდოთ Black Sea Jazz Festival / შავი ზღვის ჯაზ ფესტივალი, რომელიც ტრადიციულად ბათუმში გაიმართება. ორგანიზატორებმა ჯერ კიდევ საიდუმლოდ დატოვეს სტუმრების სია, თუმცა დაგვპირდნენ, რომ უახლოეს მომავალში გაგვიმხელენ მათ ვინაობას და ბილეთებიც მალევე ჩაეშვება გაყიდვაში.