კიდევ ერთი ”სიგიჟე” დასრულდა Black Sea Jazz Festival / შავი ზღვის ჯაზ ფესტივალი-ს სახით, რომელიც ბათუმში უკვე მეთექვსმეტედ გაიმართა.
რა უნდა ვთქვათ? კომპანია Eastern Promotions / ისთერნ პრომოუშენსი როგორც ყოველთვის მოწოდების სიმაღლეზეა. ყოველ წელს ქართველ თუ უცხოელ მსმენელს სთავაზობს ძალიან საინტერესო პროგრამას და გვაძლევს საშუალებას, ჩვენი საყვარელი მუსიკოსები ლაივში მოვისმინოთ და ვნახოთ. ასე მოხდა ბათუმშიც. სცენაზე გენიალური მუსიკოსები იდგნენ და პირდაპირი მნიშვნელობით, ადუღებდნენ იქაურობას. წამი არ იყო, რომ მსმენელს რამე სხვაზე გადაეტანა ყურადღება. იყო ზღვა ემოცია. ბევრი ჯაზი, ბევრი ფანკი, ბევრი ჰიპ-ჰოპი, ბევრი ბითი, ღიმილიანი სახეები და ენერგია, რომელიც იქ მყოფებს დადებითად ავსებდა.
ფესტივალი სამი დღის განმავლობაში, 28-30 ივლისს მიმდინარეობდა. ყოველი დღე იყო განუმეორებელი დღესასწაული. ფესტივალი გახსნა არაჩვეულებრივმა ქართულმა ჯგუფმა Bedford Falls. რომლის შემდეგაც სცენაზე დადგა გენიალური Soul Train.
შემდეგი დღე ლეგენდარულ მუსიკოსს, მარკუს მილერს დაეთმო, რომელმაც მსმენელს სხვა ჰიტებთან ერთად, ცნობილი Blast შესთავაზა 2007 წლის ალბომიდან Free და რომელიც ყველასთვის მოულოდნელი იყო. მარკუს მილერთან ერთად სცენაზე იდგნენ არაჩვეულებრივი მუსიკოსები ️️Anwar Marshall – Drums, ️Donald Hayes – Sax, ️Xavier Gordon – Keys, Russell Gunn – Trumpet.
ბოლო დღე კი დაეთმო დაუღალავ, ენერგიით სავსე BROOKLYN FUNK ESSENTIALS, რომლებმაც ჯაზის, ფანკის და ჰიპ-ჰოპის რიტმებით გააბრუეს მსმენელი და ფესტივალიც სადღესასწაულოდ დახურეს.
სამწუხაროდ, ჩვენ მხოლოდ მარკუს მილერის გადაღება მოვახერხეთ. ვრცლად მარკუს მილერზე და ფესტივალზე კი ჩვენს ბლოგში ვისაუბრებთ, რომელსაც უახლოეს დღეებში შემოგთავაზებთ.
