ის რაც 29 ივნისს არტოს ბაღში მოხდა, იყო მართლაც ჯაზის ზეიმი, თუმცა მოდით თავიდან მივყვეთ.
28-29-30 ივნისს, არტოს ბაღში გაიმართა რიგით მეხუთე Midsummer Nights Jazz Fest, რომლის ორგანიზატორიც გახლავთ ZMG-Art. ფესტივალს საკმაოდ ბევრი მონაწილე და მაყურებელიც ჰყავდა. სამწუხაროდ ჩვენ მხოლოდ ერთ საღამოს დავესწარით, თუმცა ამ ერთი საღამოდანაც კარგად ჩანდა თუ როგორი მრავალფეროვანი და ენერგიული ფესტივალი იყო წლევანდელი ”მიდსამარი”. წელს, ცნობილ მუსიკოსებთან ერთად ფესტივალის სცენაზე გამოჩნდნენ დამწყები, ძალიან საინტერესო მუსიკოსები და ბენდები. ასევე, წელს „ზაფხულის ღამის ჯაზის“ სპეციალური სტუმრები იყვნენ ამერიკელი ჯაზ მუსიკოსები.
29 ივნისის დღის განრიგი კი შემდეგნაირი იყო. ფესტივალი მამუკა ცერცვაძის ტრიომ გახსნა, რომელიც სოფიო მურუსიძის კვარტეტმა ჩაანაცვლა. გიორგი კახიანის კვინტეტი კი ლუკა თოფურიას კვინტეტმა და გრიგოლ ყიფშიძემ შეცვალა. The Bookmarks– ბავშვები სასწაული ხმებით და ქართული რეპერტუარით. Flying Elelphant რომელმაც სასწაულ სამყაროში გვამოგზაურა და დათო კაკულიას სეპტეტი, რომელმაც დახურა ფესტივალი და სასწაულები ჩაიდინა. ჩვენ ყველა გამომსვლელის ჩანაწერს ჩვენს იუთუბ არხზე პერიოდულად ავტვირთავთ. თუმცა, მანამდე შეგიძლიათ კოლაჟით შეიქმნათ წარმოდგენა თუ რა ხდებოდა ამ დღეს არტოს ბაღში.
ახლა კი მთავარზე ვისაუბროთ- ლუკა თოფურიას კვინტეტი
პირდაპირ ვიტყვი, რომ ჩემთვის ბევრი აღმოჩენა და სიურპრიზი იყო ამ 4 საათში. გასაოცარია ადამიანის შესაძლებლობები. ვუყურებდი, ვუსმენდი და ვფიქრობდი: რა მაგრები არიან, საიდან მოაქვთ ეს მუსიკა, რანაირად შეიძლება ეს მართლა ხდებოდეს. თუმცა ეს ყველაფერი რეალური იყო.
ლუკა თოფურია- კლავიში
ლაშა დეისაძე- გიტარა
თორნიკე აბულაძე- ალტ. საქსოფონი
დათო გოგისვანიძე (ბასმენა)- ბასი
გიო კაპანაძე- დრამი
სპეციალური სტუმარი- გრიგოლ ყიფშიძე
კვინტეტმა სამი კომპოზიცია დაუკრა. პირველი, არაჩვეულებრივი ჯო ზავინულის Young and Fine შესრულდა არაჩვეულებრივი არანჟით და შესრულებით. შემდეგ, გრიგოლ ყიფშიძე შემოუერთდა ბიჭებს და შეასრულეს კომპოზიცია Lie რომელიც თავად გრიგოლს ეკუთვნის. გამოსვლა კი დასრულდა კომპოზიციით Donald Kvaki რომელიც ლაშა დეისაძეს ეკუთვნის და რომელის დაკვრის დროსაც სცენაზე მაგარი ცეცხლი დაინთო.
ლუკას, ლაშას, გიოს და გრიგოლს სხვადასხვა პროექტებიდან ვიცნობ და ვიცოდი მათი ნიჭიერების ამბავი. ამ დრომდე არასდროს მომისმენია თორნიკე და დათო. გაოცებული ვიყავი. ჩემი ფავორიტების სიას ეს ორი არაჩვეულებრივი მუსიკოსიც დაემატა და თუ ამის შემდეგ სადმე მათ სახელებს გავიგებ ან ამოვიკითხავ, დარწმუნებული ვიქნები რომ ხარისხიან მუსიკას მოვუსმენ.
მეგონა თორნიკეს შესაძლებლობებს საზღვრები არ ჰქონდა. საიდან ამდენი ენერგია ნამდვილად ვერ გეტყვით. საღამოს განმავლობაში მან სხვადასხვა შემადგენლობით დაუკრა და თითქმის სულ სცენაზე იდგა. სრულად გათავისებული ჰქონდა ის რასაც უკრავდა. ბოლომდე იქ იყო, ბოლომდე კაიფობდა და თან არ იღლებოდა.
იგივეს თქმა შემიძლია ბასმენაზეც. თორნიკეს მსგავსად დათოც სულ სცენაზე იდგა. ბევრ მუსიკოსთან ერთად დაუკრა. მისი დინამიური ბასი კიდევ უფრო მეტ ხიბლს სძენდა კომპოზიციებს და მეტად სმენადს ხდიდა. ყველგან გამორჩეული იყო.
ლუკას იმპროვიზაციები, ლაშას ენერგიული ხაზი, გიოს პროფესიონალური დრამი, თორნიკეს კეთილხმოვანი საქსოფონი, გრიგოლის არაჩვეულებრივი ვოკალი და ბასმენას დინამიური ბასი– ეს იყო ის, რითიც მაყურებელს თავი დაამახსოვრეს ბიჭებმა. თითქმის 40 წუთის განმავლობაში ერთი წამიც კი არ ყოფილა, რომ მსმენელს ყურადღება მოედუნებინა. ბიჭები მყარად იდგნენ სცენაზე და იცოდნენ რას აკეთებდნენ.
დიდი მადლობა ფოტოების მოწოდებისთვის ილია ბაბურაშვილს