კით ჩარლზ ფლინტი დაიბადა 1969 წლის 17 სექტემბერს რედბრიჯში, ლონდონში. ის აღმოსავლეთ ლონდონში იზრდებოდა, სანამ მისი მშობლები ესექსის საგრაფოში, ჩელმსფორდის ერთ წყნარ ჩიხში გადასახლდებოდნენ — ადგილზე, რომელიც მას არასდროს შეეფერებოდა. კითი იყო დაუდეგარი, ველური და სიკვდილამდე მოწყენილი. მას ჰქონდა დისლექსია და სკოლა ისევე სძულდა, როგორც ავტორიტეტები და მითითებები იმის შესახებ, თუ ვინ უნდა ყოფილიყო. მოგვიანებით კითმა გულწრფელად ისაუბრა ამ წლებზე და თქვა, რომ მას ყოველთვის ჰქონდა მენტალური პრობლემები და იყო უკიდურესად თვითდესტრუქციული.
კით ფლინტი– მუსიკაში არავის ჰგავდა — ის იყო დემონი, რომელიც რეივ-კულტურამ პირდაპირ პოპ-კულტურის კოშმარებში გადმოაფურთხა. მან გააერთიანა რეივერები, პანკები და მეტალისტები; მან მთელ თაობას აჩვენა, როგორ ყოფილიყვნენ თავისუფლები, ხმამაღლები და თავის მართლების გარეშე — საკუთარი თავები. 2019 წლის მარტში წარმოუდგენელი რამ მოხდა. გავრცელდა ინფორმაცია, რომ კითი წავიდა.
4 მარტის დილას პოლიცია მის სახლში გამოიძახეს, სადაც ის გარდაცვლილი იპოვეს. სიკვდილამდე რამდენიმე თვით ადრე კითი მძიმე პირად კრიზისს განიცდიდა — გავრცელებული ინფორმაციით, ის და მისი მეუღლე, მაიუმი, ერთმანეთს დაშორდნენ, რამაც ის გაანადგურა. მიუხედავად ამ ტკივილისა, კითი აქტიური და ოპტიმისტური ჩანდა: მან ახლახან დაასრულა ტურნე ავსტრალიასა და ზელანდიაში, გარდაცვალებამდე ორი დღით ადრე კი ადგილობრივ მარათონშიც მიიღო მონაწილეობა და პირადი რეკორდიც დაამყარა 21 წუთი და 22 წამი. არავინ იცოდა იმ სიბნელის შესახებ, რომელიც ზედაპირის მიღმა იმალებოდა.
გიყვებით ლეგენდარული ჯგუფის The Prodigy-ის ცეცხლოვანი კაცის, კით ფლინტის შესახებ.
პ.ს. აქვე შეგიძლიათ იხილოთ The Prodigy-ის სუპერმაგარი ლაივის (არასრული) ჩანაწერი, რომელიც 2016 წლის 21 ივლისს, ბათუმში, ტენისის კლუბში გაიმართა. კადრები არ არის პროფესიონალურ დონეზე გადაღებული. ხმის ხარისხი არცთუისე კარგია, თუმცა მიხვდებით რა ხდებოდა ამ საღამოს ბათუმის ტენისის კლუბში. ეს მართლაც დაუვიწყარი ლაივი იყო რაც კი ოდესმე გადამიღია.