ალბათ ყველა ვთანხმდებით ერთ რამეზე, ირაკლი ჩარკვიანის ვინილზე მოსმენის შესაძლებლობა უკვე დიდი ხანია უნდა გვქონოდა მელომან-ვინილომანებს. მისი დანაკლისი აშკარად არსებობდა და პირად საუბრებში ალბათ ბევრჯერ შეგვიჩივლია ერთმანეთისთვის: ნეტა ჩარკვიანის ვინილი არსებობდეს. ნეტა არ დაპრესავენ?.. და აი, როგორც იქნა ეს დღეც დადგა. უამრავი ადამიანის ოცნება ახდა და ამ ყველაფრის ინიციატორი ”ქართული მუსიკალური მემკვიდრეობა” გახლდათ. ადამიანები, რომლებმაც შეუძლებელი შეძლეს და კიდევ ერთხელ დაამტკიცეს მათი არსებობის აუცილებლობა.
“ქართული მუსიკალური მემკვიდრეობის” მერვე გამოცემა, ქართული პოპ-კულტურის და ანდერგრაუნდის პიონერის, ირაკლი ჩარკვიანის 2001 წელს გამოსულ ალბომს, ”ამო” დაეთმო. ვინილის ფირფიტის პრეზენტაცია 2024 წლის 13 ოქტომბერს, ”მუტანტ რადიო”-ში შედგა. ”ამო” ირაკლი ჩარკვიანის რიგით მესამე სოლო ალბომია, რომელშიც შესულია 13 ტრეკი. ალბომი კასეტის და კომპაქტ დისკის სახით გამოიცა. ის ერთი წლის მანძილზე იწერებოდა, თუმცა სიმღერები „საქართველო“ და „უსაფრთხოება“ უფრო ადრე შეიქმნა. დისკი მეტწილად როკ-მუსიკის ელემენტებს ატარებს, თუმცა ელექტრონული რითმებიც ახასიათებს. ირაკლი ჩარკვიანის თქმით, ეს იყო მისი ყველაზე კონცეპტუალური ალბომი, სადაც აისახა თანამედროვე რეალობა. ალბომის გარეკანის დიზაინი ეკუთვნის ირაკლის შვილ მაქსიმე ჩარკვიანს, ხოლო გარეკანზე გამოტანილი ფოტოსურათი 1912 წელს უცნობი ფოტოგრაფის მიერ არის გადაღებული.
რაც შეეხება ალბომის ახალ გამოცემას. მინდა ვთქვა, რომ იდეალური ხარისხია. ძალიან კარგი მასტერინგი, მჟღერი და მსუყედ ჩაწერილი. სიმართლე გითხრათ არ მახსოვს არც კასეტის და არც კომპაქტ დისკის ხარისხი, თუმცა ვინილი მართლა კარგად ისმინება. ყდაზე დატანილია უცნობი ფოტოგრაფის მიერ გადაღებული ფოტო. ფოტოს ქვედა მარჯვენა კუთხეში კი ქართულად აწერია- ირაკლი ჩარკვიანი. ხოლო მეორე მხარეს დატანილია ტრეკლისტი, ალბომზე მომუშავე ადამიანებზე ინფორმაცია და ალბომის შესახებ ინგლისურ ენოვანი ანოტაცია.
”მუტანტ რადიოს” ეზოში მისულებს უამრავი ადამიანი დაგვხვდა. დაახლოვებით 20 მეტრიანი რიგი იყო გასავლელი, რათა ხელში აგეღო დიდი ხნის ნანატრი ალბომი. ერთი ისიც კი გავივლე აზრად: ვაიდა არ შემხვდეს… ცხოვრებაში ამდენი მართლა არ მინერვიულია. აკვიატებული ფიქრები. გამოსავალის ძებნა და სტრესი ერთდროულად მომაწვა. რიგი წინ მიდიოდა და ადრენალინიც კიდევ უფრო და უფრო მატულობდა. აი ავედი კიბეზე. დაახლოვებით 6 მეტრი მაშორებს სანატრელი ალბომის ხელში აღებას. უცებ ვიღაცამ ოვაციები ვეღარ შეიკავა და კივილი დაიწყო. დიახ, მან აიხდინა ოცნება. მეც მალე მივალ მაგიდასთან. ჩემ წინ კიდევ 5 ადამიანია. მაგიდას გავხედე და სანთლის შუქზე ყუთებს მოვკარი თვალი, სადაც უკვე თითქმის აღარ ჩანდა ვინილები. ”არ გათავდე. არ გათავდე. შემხვდი”. კიდევ 3 ადამიანი. უკან ისევ დიდი რიგია. ნეტა ამ ხალხს თუ შეხვდება? რამოდენიმე წამიც და აი ისიც, ჩემ ხელშია. შევეხე. ჩავიხუტე. შვებით ამოვისუნთქე…
როგორც ავღნიშნეთ, ალბომში შესულია 13 ტრეკი.
- საქართველო
- ამო (მზეო)
- ამო
- ერთად
- ბუია
- სექსი
- ორღანი 78
- დისკო
- ისტორიას
- როგორც ჩანს
- ჭერს
- უსაფრთხოება
- წყალს
სულ გამოცემულია 180 ერთეული. ვინილის კატალოგის ნომერია GMLC008. ალბომში შესულია ორი 145 გრამიანი ფირფიტა ქაღალდის დამცავით. ბარკოდის ნომერია 859736417305
