ის, რომ საქართველოში უკვე ბევრი ძალიან კარგი მუსიკოსია ეს უდაოა. ამას ამტკიცებს ბევრი ფაქტორი. უკვე ტენდენციად ქცეული ცოცხალი შესრულება სხვადასხვა ბარში, კაფეში თუ საფესტივალო სცენაზე. უამრავი მუსიკოსია რომელიც კიდევ არ აღმოგვიჩენია და ვინ იცის, როდის მოვუსმენთ მათ შესრულებას. ძალიან კარგია ის ფაქტიც, რომ ახალგაზრდა შემსრულებლებს საშუალება ეძლევათ მიიღონ მონაწილეობა სხვადასხვა ფესტივალში და წარმოაჩინონ თავისი მუსიკა და ნიჭი.
პირადად ჩემთვის, Midsummer Night Jazz Fest აღმოჩენებით სავსე იყო. ერთი ასეთი აღმოჩენა ჩემთვის ბენდი Flying Elephant იყო, რომელმაც ძალიან დიდი შთაბეჭდილება მოახდინა არა მარტო ჩემზე, არამედ ყველა იქ მყოფზე. მათი მუსიკა საკმაოდ ღრმა და ამავდროულად ელეგანტური, შინაარსიანი და დროს კარგად მორგებულია. Fusion, Jazz, Psychedelic, Hip-hop და Progressive R&B-ის ნაზავი მუსიკა შთაბეჭდილებას გიტოვებს, რომ შენც ამ მუსიკის დიდი ნაწილი ხარ. სცენაზე მდგომი 4 ადამიანი დროებით გწყვეტს რეალობას და სადღაც მიყავხარ. თითქოს წარსულში, მაგრამ ამავროულად თანამედროვე სამყაროში. პირველ კომპოზიციაში ზვიად გამსახურდიას და მერაბ კოსტავას ხმა გაბრუნებს უკან და თითქოს თავიდან განგაცდევინებს 90-იანების ყოფას. ბოლო კომპოზიციაში კი ჰამლეტ გონაშვილის ”დაიგვიანეს” სემპლი საბოლოოდ ამყარებს მუსიკოსების ღრმა ცოდნას და ოსტატობას.
თუ არ იცნობთ გაიცანით, შეიყვარეთ და იცოდეთ. თუკი სადმე აფიშაზე მოჰკარით თვალი წარწერას Flying Elephant ან უბრალოდ FE Project, ეს იმას ნიშნავს, რომ იქ მისული კარგ და ხარისხიან მუსიკას მოისმენთ.
კოტე ლაშხი- კლავიში
გია გამყრელიძე- დასარტყამი ინსტრუმენტი
გივიკო გაბუნია- საქსოფონი
ნიკუშა ბრეგვაძე- ბასი/გიტარა