Gaga Frani-ს სადებიუტო ალბომი 2023 წლის 15 მარტს გამოიცა. თუმცა, მანამდე საკმაოდ დიდი მოსამზადებელი პერიოდი იყო. ყველაფერი კი 2022 წელს დაიწყო, როდესაც გადაწყდა ალბომის ვინილის ფირფიტაზე გამოცემა. დაიწყო ფიქრი, თუ რომელი სიმღერები უნდა შესულიყო ალბომში. რადგან მისი ყველა სიმღერა ჰიტია, ამიტომ არჩევანის გაკეთება საკმაოდ რთული აღმოჩნდა.
საბოლოოდ გადაწყდა, რომ ალბომში 7 სიმღერა შესულიყო. შემდეგ იყო ამ შვიდი სიმღერის ხელახლა ჩაწერა და საალბომედ მომზადება. სიმღერები მალევე ჩაიწერა სტუდიაში ”33ა” და ბერლინში, ერთ-ერთ საუკეთესო სტუდიაში გაიგზავნა დასამასტერებლად, რომელშიც ასევე დაიპრესებოდა და ალბომის სახით გამოიცემოდა.
ყველაფერი მზად იყო ერთის გარდა. ყდა და ალბომის გაფორმება. რა თქმა უნდა ყდაზე ფრანი უნდა ყოფილიყო. იყო ბევრი ვერსია, თუმცა საბოლოოდ ფრანს ჩაჭიდებული ადამიანის სილუეტი გადაწყდა, რომელიც ვფიქრობთ ძალიან კარგად ჩაჯდა ალბომის კონცეფციაში. ასევე, სპეციალურად გამზადდა ქართული და ლათინური ფონტი.
ერთ დღეს კი მოდის მეილი, სადაც ბერლინიდან იწერებოდნენ, რომ ტესტ პრესი და ყდა მზად იყო გამოსაგზავნად. ალბათ ყველაზე გრძელი 2 კვირა ის ორი კვირა, თუმცა შედეგმა მოლოდინს გადააჭარბა. ჩანაწერის მხრივ ყველაფერი იმაზე კარგად იყო, ვიდრე ვინმეს ეგონა. თუმცა, იყო ერთი პატარა პრობლემა. ყდა და ფონტი. რატომღაც სხვა ფონტით იყო დაბეჭდილი. მალევე ყველაფერი გამოსწორდა და ალბომის საბოლოო ვარიანტი, უკვე შეგიძლიათ ჩვენს გვერდზე შეიძინოთ. თუმცა, იცოდეთ, რომ ამ ალბომს ორი სხვადასხვა ყდა აქვს 🙂
ტრეკლისტი:
ა გვერდი
1. ვუსმენ გულს
2. შენ ხომ იცი
3. მთვრალი ვარ
4. შემოდგომა
ბ გვერდი
1. მარტი მოვიდა
2. მზეო დაბრუნდი (ლექსი ნოდარ დუმბაძისა)
3. ეს მე ვარ
ალბომი ჩაწერილია: 33A\audio recording Studio “ხმის ჩამწერი სტუდია”
ხმის რეჟისორი: ლევან კიკვიძე
სიმღერების ავტორი: გაგა ჩიხლაძე
გამოცემულია გერმანიაში 2022 წელს