სექტემბერი დატვირთული თვე გამოვიდა იუბილარებით და მნიშვნელოვანი თარიღებით. 16 სექტემბერი ბლუზის მეფის, ბიბი კინგის დაბადების დღე იყო. 23 სექტემბერი ჯონ კოლტრეინის. 28 სექტემბერს კი მაილს დეივისი გარდაიცვალა. ჩვენი სექტემბრის თვის ფილმებიც სწორედ ამ ადამიანების მიხედვით დავგეგმეთ და მგონი არც შევმცდარვართ. ალბათ მიხვდით, მაგრამ მაიც დავაზუსტებთ. კვირას, 20 სექტემბერს წარმოგიდგენთ ამბავს დიდებული საქსოფონისტის, ჯონ კოლტრეინის შესახებ, ხოლო მომდევნო კვირას, 27 სექტემბერს უკვე მაილს დეივისზე ასევე ძალიან კარგ ფილმს და ამით დავხურავთ სექტემბრის დიდებულ თვეს. აქვე შეგახსენებთ, რომ წელს კოლტრეინის და დეივისის 100 წლის იუბილეა, ამიტომ არ ვიქნებოდით მართლები ამ ადამიანების წვლილს მუსიკის და ჯაზის განვითარებაში რომ არ გამოვხმაურებოდით და შევხებოდით.
ჯონ კოლტრეინი– დაიბადა 1926 წლის 23 სექტემბერს, ჩრდილოეთი კაროლინაში. ამერიკელი საქსოფონისტი, კომპოზიტორი და მეოცე საუკუნის მუსიკის ისტორიაში ერთ-ერთი ყველაზე გავლენიანი ფიგურა. მან სრულიად შეცვალა ჯაზის განვითარების ვექტორი, დაამკვიდრა დაკვრის ინოვაციური ტექნიკა და მუსიკა სულიერი ძიებისა და მედიტაციის ხელოვნებად აქცია.
კოლტრეინმა კარიერა დაიწყო ტრადიციული ბიბოპით და ჰარდ-ბოპით, თუმცა წლების განმავლობაში განავითარა ე.წ. „ბგერათა ზეწრები“ — დაკვრის განსაკუთრებით სწრაფი ტემპი. მოგვიანებით კი მოდალური ჯაზისა და თავისუფალი ჯაზის პიონერი გახდა. კოლტრეინი იყო მაილს დეივისის ლეგენდარული კვინტეტის წევრი. მან უდიდესი როლი ითამაშა ჯაზის ისტორიაში ყველაზე გაყიდვადი ალბომის, Kind of Blue-ს შექმნაში. თელონიუს მონკთან ერთად მუშაობამ კი, კოლტრეინს ჰარმონიული აზროვნების სრულიად ახალი ჰორიზონტები გაუხსნა. 1960-იან წლებში მან ჩამოაყალიბა თავისი საუკეთესო ჯგუფი მაკკოი ტაინერის (ფორტეპიანო), ჯიმი გარისონისა (კონტრაბასი) და ელვინ ჯონსის (დრამი) შემადგენლობით.
1960 წელს გამოსცა ალბომი Giant Steps, რომელიც ჯაზის მუსიკოსებისთვის დღემდე აკორდების მიმდევრობისა და იმპროვიზაციის უმაღლეს, ყველაზე რთულ გამოცდად ითვლება. 1965 წელს კი გამოსცა ოთხნაწილიანი რელიგიურ-სულიერი სუიტა- A Love Supreme, რომელიც მუსიკოსის შემოქმედების მწვერვალად და ყველა დროის ერთ-ერთ საუკეთესო მუსიკალურ ნამუშევრად არის მიჩნეული. ფილმიც, სწორედ ამ ალბომზე და მის გავლენებზეა. ნახავთ, თუ როგორ შეცვალა ამ ალბომმა უამრავი ადამიანის ცხოვრება. ეს არის ფილმი, რომელიც საერთოდ შეგიცვლით წარმოდგენას ჯონ კოლტრეინზე და საერთოდ სხვა თვალით დაგანახებთ მას და მის შემოქმედებას.
თუ ჯერ კიდევ არ მოგისმენიათ ეს ალბომი, აუცილებლად მოისმინეთ. თუ ჯერ კიდევ არ გაქვთ კოლექციაში ეს ალბომი, აუცილებლად შეიძინეთ.