რა უნდა ვიცოდეთ ფირსაკრავის შესახებ?

ბოლო წლებია საკმაოდ პოპულარული და ტრენდული გახდა ვინილის ფირფიტები და ფირსაკრავები. ვერავინ წარმოიდგენდა, რომ ციფრულ ეპოქაში ანალოგ ჟღერადობას ადამიანები ისევ დაუბრუნდებოდნენ და ეს არა მხოლოდ საქართველოში, არამედ მთელ მსოფლიოში ისევ მოთხოვნადი გახდებოდა. ფირფიტების ფასმაც რა თქმა უნდა მოიმატა და თუ 2018 წელს კონკრეტული ფირფიტა უცხოურ საიტზე შეგეძლოთ 5 დოლარად შეგეძინა, 2023 წელს მისი ფასი მინიმუმ გაორმაგებულია, თუმცა ფირფიტის ფასს სხვადასხვა ფაქტორი განსაზღვრავს და ამაზე სხვა დროს მოგახსენებთ.

პირველ რიგში გეტყვი, რომ თუ სერიოზულ კოლექციონერობას აპირებთ არ არის ეს იაფი სიამოვნება. კარგი სისტემის აწყობას საკმაოდ დიდი თანხები ჭირდება, რომ აღარაფერი ვთქვათ ფირფიტების კოლექციის შექმნაზე.

მიუხედავად ტრენდულობისა, საქართველოში ახალი ფირსაკრავების დიდი არჩევანი სამწუხაროდ ჯერ კიდევ არ არის, თუმცა არის რამოდენიმე მაღაზია, სადაც შეძლებთ ყიდვას. დღეის მონაცემებით შეგვიძლია სხვადასხვა მაღაზიაში მოვიძიოთ შემდეგი ბრენდის ფირსაკრავები

1. პეგას აუდიო- შედარებით ბიუჯეტური ფირსაკრავები შეგიძლიათ ნახოთ. Aiwa ან Denon რამოდენიმე მოდელი.

2. ვოდკასტი- Pro-ject-ის სხვადასხვა მოდელებს მოიძიებთ

3. აუდიოჰოლი- Thorens-ის შედარებით ძვირიანი, მაგრამ ხარისხიანი პროდუქცია.

4. მუსიკის სახლი- Crosley და Ion Audio-ს რამოდენიმე მოდელი

5. ჰერცი და ლუმენი- Chroma-ს რამოდენიმე მოდელი

არსებობს ორი სახის ფირსაკრავი. ე.წ. ჩემოდანი, რომელსაც ინტეგრირებული აქვს დინამიკი, ბლუთუზი, რადიო, USB და 1000 უსარგებლო გადამრთველი, რომელსაც არაფრის დიდებით არ გირჩევთ თუ რა თქმა უნდა აპირებთ კოლექციონერობას და ამ საქმეში ჩართვას. თუ უბრალოდ გასართობად გინდათ და მხოლოდ ერთეული ფირფიტის მოსმენა წელიწადში რამოდენიმეჯერ ან სულაც ინტერიერში დეკორად გამოყენება, მაშინ მოსულა

”ჩემოდანს” ბევრი მინუსი აქვს. პირველი არის უხარისხო ხმა, რომელიც დიდი ხნის სმენის შემდეგ ყურს აშკარად ღლის. მას არ გააჩნია რეგულირებადი ტონარმი, რის შედეგადაც ფირფიტებს რომელსაც მასზე დადებთ და მოუსმენთ, რამოდენიმე მოსმენის შემდეგ გააფუჭებთ. მისი ტონარმი იმაზე მეტად მძიმეა, ვიდრე უნდა იყოს. ზედმეტი წონა აფუჭებს ნემსს და მალე იცვითება. ასევე იცვითება ფირფიტის ღრმული, რაც იწვევს უკვე ჟღერადობის გაუარესებას. ასევე, პლასტმასის უხარისხო და მსუბუქი ჩარჩო, რომელიც ვერ უზრუნველჰყოფს ტონარმის მდგრადობას და მცირედ ვიბრაციაზე ხტება, რაც ფირფიტის დახაზვის და გაფუჭების კიდევ ერთი წინაპირობაა. ალბათ დამეთანხმებით, როდესაც ფირფიტაში ვიხდით თუნდაც 100 ლარს და ის რამოდენიმე დადების შემდეგ იჩხაპნება, საკმაოდ რთული გადასატანია ნამდვილი მელომან-ვინილომანისთვის.

მეორე კი გახლავთ უკვე HI-FI კატეგორიის საკრავები, რომელებსაც აქვთ ბევრი პლიუსი და ერთი მინუსი, უბრალოდ ძვირი ღირს ამ ტიპის საკრავები დამოუკიდებლად ხმას ვერ გამოსცემს, რადგან მას აუცილებლად ჭირდება შემდეგი კომპონენტები: პრე-გამაძლიერებელი ან გამაძლიერებელი და აქტიური ან პასიური სფიქერები (რომელიც უკვე გამაძლიერებელზე ერთდება) ზოგ მოდელს ჩაშენებული აქვს პრე-გამაძლიერებელი და ის შეგვიძლია პირდაპირ დავაერთოთ აქტიურ სფიქერებზე ან გამაძლიერებელზე და შემდეგ პასიურ სფიქრებზე.

კარტრიჯი/ნემსი– ყველაზე ფაქიზი კომპონენტი მთელს ფირსაკრავში. არსებობს ორი სახის კარტრიჯი: Moving Magnet და Moving Coil. პირველი თითქმის ყველა საბაზისო კომპლექტაციაში გვხვდება. Moving Coil კი სპეციალურად უნდა შეიძინოთ, რადგან ის გაუმჯობესებულია, ძვირია და მეტად ხარისხიან ხმას გამოსცემს, ვიდრე Moving Magnet კომპლექტაცია. თუმცა ამ სახის კარტრიჯი უკვე მაღალბიუჯეტურ საკრავებშიც გვხვდება. ეცადეთ, კარტრიჯს არ დააწვეთ ზედმეტად. არ გააცუროთ გვერდზე. არ დააგდოთ ტონარმი ფირფიტაზე, რადგან ამან შეიძლება გამოიწვიოს ნემსის დაზიანება და რაც მთავარია, წონა გაანაწილეთ 1,5 გრამიდან, მაქსიმუმ 2,5 გრამამდე. ამისთვის კი უნდა შეიძინოთ მექანიკური ან ციფრული სპეციალური სასწორი. შეიძლება ვინმემ იკითხოს რა არის ტონარმი მოგახსენებთ. ტონარმი არის მსუბუქი ჯოხი, რომელსაც ერთ მხარეს ნემსი (კარტრიჯი) აქვს და მეორე მხარეს წონის სარეგულირებელი ბურთულა. წონის რეგულირება აგვაცილებს ფირფიტის დახაზვა-დაჩხაპვნას ან სულაც ნემსის თავის სწრაფ გალევას. ასევე, ვიბრაციის ზემოქმედებას და ტონარმის გადახტომას.

ამ კომპონენტს აქტიურად იყენებს დიჯეინგით დაკავებული ხალხი, თუმცა ჩვეულებრივ ყოფაში ის შეიძლება არც დაგვჭირდეს.

არსებობს 2 სახის საკრავი: ავტომატური და მექანიკური. ავტომატური საკრავის პლიუსი ის არის, რომ თქვენ თითქმის არ ეხებით ტონარმს. ღილაკზე ერთი დაჭერით ტონარმი ავტომატურად რეაგირებს და გადადის პირველივე სიმღერაზე. როდესაც გავა ფირფიტის ბოლოში და დასრულდება, თეფში ავტომატურად აჩერებს ტრიალს, ხოლო ტონარმი უბრუნდება საწყის პოზიციას. მექანიკურ საკრავებს კი ეს ”პრვილეგია” არ გააჩნიათ. მას სულ ყურადღება და კონტროლი ჭირდება.

ჩარჩო რაშიც მთელი ეს ყველაფერია მოქცეული საკმაოდ მნიშვნელოვანია. ჩარჩოს სიმძიმე დამოკიდებულია მის მასიურობაზე. რაც უფრო მასიურია ჩარჩო, მით ნაკლებია შანსი ვიბრაციისა და ტონარმის გადახტომისა. მოერიდეთ მსუბუქი პლასტმასისგან გაკეთებულ საკრავებს.

ეს სისტემა უზრუნველჰყოფს ნემსის სწორად მიმდინარეობას ფირფიტის ღრმულში და თავიდან აგვაცილებს ნემსის სწრაფ გალევას ანდა სულაც ფირფიტის ღრმულის დაზიანებას. ასევე, დიდი მნიშვნელობა აქვს მის სწორად განლაგებას ხმის ხარისხისთვის. საბოლოო ჯამში თუ ყველა ეს კომპონენტი მაქსიმალურად სწორად გაქვთ გასწორებული, მით უფრო კარგი ჟღერადობა გექნებათ და ის ”კაიფი” რაც ვინილის ფირფიტას გააჩნია, ბოლომდე შეგიძლიათ შეიგრძნოთ. აი შემდეგ კი ნამდვილად ვეღარ გაჩერდებით და იწყება ახალი ეტაპი: ვინილომანია, რომელიც არ იკურნება

აი ეს არის ბაზისი, რომელიც გამოგადგებათ ფირსაკრავის სწორად შერჩევაში. რა თქმა უნდა არის კიდევ სხვადასხვა კომპონენტი ისეთი როგორიც არის თეფში, დასაფენი, ღვედით ან პირდაპირ მართული საკრავი, თუმცა ამაზე საუბრით თავს აღარ შეგაწყენთ, რადგან HI-FI კატეგორიის საკრავებს ეს კომპონენტები ასე თუ ისე საბაზისო აქვს და როდესაც პირველად ყიდულობ საკრავს, შეგიძლიათ ამას არ მიაქციოთ ყურადღება. თუმცა შემდგომში თქვენ ყოველთვის შეგიძლიათ გააუმჯობესოთ თქვენი საკრავი თუ აუდიო სისტემა.

თუ ამ ყველაფრის შემდეგ ჯერ კიდევ არ გადაგიფიქრებიათ ვინილომანობა, წარმატებებს გისურვებთ