მაილს დეივისი– ამერიკელი მესაყვირე, კომპოზიტორი, ბენდლიდერი და მე-20 საუკუნის ერთ-ერთი უმნიშვნელოვანესი მუსიკალური ნოვატორი. დაიბადა 1926 წლის 26 მაისს, ილინოისის შტატში. მან თითქმის მარტომ, რამდენჯერმე შეცვალა ჯაზის განვითარების მიმართულება და საფუძველი ჩაუყარა მის რამდენიმე წამყვან მიმდინარეობას. დეივისი გამოირჩეოდა მინიმალისტური, მკაფიო, ლირიკული და ხშირად სევდიანი ჟღერადობით, რისთვისაც ხშირად იყენებდა სპეციალურ სურდინას ე.წ. Harmon mute-ს. 1940-იანი წლების ბოლოს ჩაწერა ალბომი Birth of the Cool, რითაც საფუძველი ჩაუყარა უფრო მშვიდ და აკადემიურ მიმდინარეობას. ტრადიციული რთული აკორდების ნაცვლად, აქცენტი გადაიტანა მუსიკალურ კილოებზე ანუ მოდუსებზე, რაც მუსიკოსებს იმპროვიზაციის მეტ თავისუფლებას აძლევდა. 1960-იანი წლების ბოლოს ჯაზი შეაერთა როკთან და ელექტრონულ ინსტრუმენტებთან, რითაც სრულიად ახალი ერა დაიწყო. 1959 წელს ჩაწერა ალბომი Kind of Blue, რომელიც ჯაზის ისტორიაში ყველაზე გაყიდვადი და აღიარებული ალბომია. მასში მონაწილეობს ლეგენდარული სექსტეტი, მათ შორის ჯონ კოლტრეინიც. 1970 წელს გამოსცა ალბომი- Bitches Brew, რევოლუციური ფიუჟენ-ალბომი, რომელმაც ელექტრონული ინსტრუმენტებითა და ფსიქოდელიური ჟღერადობით სამუდამოდ წაშალა საზღვრები ჟანრებს შორის. 1960 წელს გამოუშვა ალბომი- Sketches of Spain, რომელიც ესპანური ხალხური მუსიკისა და ჯაზის გენიალური სინთეზი გახლავთ. ის კომპოზიტორ გილ ევანსთან თანამშრომლობით შეიქმნა.
გარდაიცვალა 1991 წლის 28 სექტემბერს